做主場是唯一出路

這邊廂，今屆政府做好多所謂的大項目，有高鉄有大灣區有一路一帶，有港珠澳大橋等等，香港似係走向下一個新世代的機遇，而林鄭亦不只此講明大灣區將為香港年輕人帶來好多機會。


那邊廂，呢排當同親朋討論政治，特別一講到將來，年青人的去向，好多人都感到比較灰暗，然後就只係活在當下，過得一日就一日，並無所謂意識到講咁多大項目所帶來的任何利益，也許只係打份工，港珠澳又好高鉄又好，可能只係番大陸玩方便點咁講，但講到嘩好撚有計好大利益咩，就丁點都無，所以呢個可能就係所講的離地吧。


作為一個小市民，講真你起咩大橋搞咩大灣區，老老實實我都係打份工食個茶記，香港呢個環境並無營造如國內處處商機的營商環境，但係大企業呢一來又不思進取，二來又唔夠走出黎的國企玩，係香港已經見到老牌發展商好大企業好只係係度維持業務，但國企黎插旗呢就日以繼夜咁，海航買地就係一個好好的故事，雖然似係失敗，但來的企業係只會越來越多，但呢個海航的故事有一個啟事比到我地的係，猛虎不及地頭蟲。


先勿論故是死因係咪政治原因定係資金鏈斷裂，問題係你黎香港玩就要跟香港的規矩，咁跟香港的規矩就即係我係主場你黎作客，呢個概念就好緊要了。


所以離地的原因，就係在於如果我地成日諗推D後生仔年輕人上大陸發展，呢個係作客的行為。十幾年前隊長去北京作客，果時香港人仲有優勢人地都覺得你質素稍稍高小小。但今時今日以至將來呢？隊長我就睇住公司的發展係由香港重心變晒上海，而新黎的同事已經英文唔錯，旅行去歐洲果種大陸人，雖則你可以見到諗法能力有時佢地都唔係話咁標青，不過當你埋枱食飯，幾十人都係大陸人，成個文化係會將香港同台灣分到出黎，你就知香港／台灣黎大陸作客，已經無運行。


隊長我地呢D中坑都仲叫做好彩食左D優勢仲有野水尾享受下個成果，但今時今日推條靚仔上大陸，然後同佢講喂機遇處處啊，我敢問你憑乜同人鬥。接下來的世界係中國的，呢個係不爭的事實，你無人無物無人胍，你想係大陸同一齊同期的人鬥，點玩？難聽D講，你連個微信錢包都無，叫車去邊你都去唔到唔識，開個銀行連大陸電話號碼都無，你要係大陸作客生存都已經困難，仲要係唔同語言同文化下競爭？咪撚玩啦。


係香港做主場，唔代表你好有優勢，因為如隊長咁諗，呢家香港企業十間有九間都要同大陸人合作做對口，你成公司香港人，突然有個讀到master degree黎見工唔太差又係香港畢業的大陸港漂，肯做肯捱叫價仲唔高，問心你請個香港人定係請個可以幫你公司更同大陸接軌的呢？好明顯啦，係主場都好，作客果班大陸人都係有優勢，之不過因為你係主場，你同聲同氣，你拉平左個競爭條件而已。


短短篇幅好難講晒所有野，但如果你領會到今日的情況，將問心估下十年廿年三十年後，你估下中國係國際社會地位，中國的經濟實力，可能連美國都要收檔的時間，香港就更加唔好諗點样點咩，唯一的出路就係你仲係香港有你自己的話語權，即係話好似無論出面變成點，你係你間屋度，都多少仲有得屌下鬼咁。所以呢，佔領資產，係其中一個玩法。


但如果有一日，連資產都無埋，咁你問下你自己，又或者望下你屋企的年青人，可以點？前路茫茫，如果仲想留點自己的空間，就一定要做主場，要做主場，就要有個主場，買樓，係其中一個選擇。