什麼是理財

係坊間成日都會聽到唔同關於理財的信息，但對於好多人黎講，其實乜野係理財的概念係十分之模糊，比如話買份投資基金的保險就係理財，買份理財產品就係理財，炒下股票就係理財，基本上好廣義咁講，你只要用你舊錢去嘗試搵錢，就係理財。


當然無人有絕對可以為理財定義，因為對於每個人都可能有唔一样的投資以及唔一样的理解，即你可以話做定期都係理財都得。之不過話說隊長前排係上水天橋見到有個阿叔，打正某間本地金融公司旗號，一個人著住西裝係行人天橋度派傳單，然后背景個易拉架係講MPF同退休，呢下隊長就真係有感而發。當然隊長無走埋去同佢傾，所以係極度主觀咁睇呢件事，然而隊長認為如果呢位阿叔好有料的，佢又點會企係條天橋仲要一個人黎派傳單講MPF理財的退休產品呢? 即係如果佢咁有料，一係就佢個年紀都退左休，又或者有班兄弟黎幫手啦，單打獨鬥，我只可以諗係中年無野做入行然後係天橋自己拉客而已，雖則勇氣可嘉，但隊長不得不問，你識唔識架？


唔理阿西裝阿叔係點，其實放遠番黎睇，好多保險公司金融公司，其實根本無一套完整的理財概念陪訓比班sales，話就話日日可能有咩新聞分享，簡唔中又有零散的training內容可能講selling skill講產品甚至講養生的野，之但係真真正正一整套乜野叫理財呢？在隊長而言好多sales認為幫襯佢呢就係理財，而更搞笑的係幫襯個sales的客，又以為自己真係理財喎。當然，隊長又會比番個credit係其實保險界入面係有個別的產品係可以做到單一而又完整的理財目的，包括係做遺產或走資之類等等，然而對於隊長黎講，我認為99%的保險從業員都係無一套完整理念，即係只要著住套西裝就變成理財顧問甚至理財專家，呢件事其實係幾危險，不過無人會理。


其實一個完整的理財概念，係由你無錢可以變到有錢，有錢就變到唔駛點駛做，然後仲會繼續賺，然後中間又有D保障去保住你成個人生的計劃，然後到你臨老時又會幫你退休以及遺產安排，成件事係陪伴你成長的一個auto-pilot之餘仲會幫到你利用錢賺錢咁輕鬆同無憂咁規劃人生。而當中係涉及基本上大部份流行的產品，包括樓/股/債/基金/保險/MPF等等，而一咁講可想而知係呢度涉及多個範疇，而你係條街見到的所謂理財顧問，可能只係專業係一样野兩样野入面，但成套計劃點样一個駁一個咁交接令你真係全面理財呢，可以話無。


你可能話唔同意喎，我個保險理財顧問佢都有炒樓架!! Well，最大問題係角色衝突嘛，佢炒樓佢的事，佢買股佢的事，但佢比得張咭片你時，你試下同佢講你有200萬，你估佢會叫你買樓定係幫襯佢買基金啊? 哪怕佢可能知你買樓需要大，但係佢人在江湖，睇你咁大舊lump sum唔sell你，真係傻L左咩? 換句話說，理論上每個自己專業的專家都會以自己個專業行頭先，話之你個portfolio係點，咁好難夾出一個合理而又平衡的portfolio，就算果個sale係你老友，佢最多都係唔做你生意真心為你好，不過要橫向咁同一時間幫你plan晒樓/股/債/基金/保險/MPF，然後又縱向咁由你細個去到老都聽佢支笛變成財務自由甚至置富，而佢又要做到一個咁样的人生係你覺得值得學習的，係呢個社會上係接近零，有呢D人佢教你又費事，而真係機緣巧合佢肯教你，你聽唔聽學唔學到又係另一個問題。


其實大家可以睇到大部份打工仔，佢地的目標以及理財顧問sell的，都係大緻上講退休，而先唔好講佢地的產品係咪可以如佢地sell時幫你退休，呢D野個plan完左幾十年至知，又或者你玩十年八年都係多一舊錢咁样，實際上可以話係買完供完之後，你又退唔到休繼續做，佢又退唔到休要搵下個客，好多人仲會覺得自己已經理左財，安安心心埋頭苦幹咁繼續做，實際上你話佢有無理左財呢？好似有，又好似無。


其實一個真正的理財顧問，隊長認為係各個財務自由達人，而財務自由達人大部份都唔係收錢sell野，其實真係有心想學的人好容易就接觸到。簡單的講，所謂的理財顧問，有幾多人可以財務自由，選擇唔撈或唔做你生意但比真心意見你？就隊長目前所識的，好似無。