下一個升浪的條件漸成熟


今日恆指又再創新高,最高報28626點,尾市回軟但都高收28458點,之前跌左幾日,但十一黃金周後的十九大又令香港報復性上升,個市好似唔識跌咁,呢個感覺又好似去番之前2007年的32000點咁,當然股市唔會無止境咁升,終有一日跌(樓都係),但調整幅度同估頂呢D野隊長唔諗先,只係講呢家個股市旺到發癲,可以睇到又發了一班人之餘,市場資金好多亦係一個因素,所以有人賺左錢出黎買樓亦唔係咩新奇事。


今次股市升的一個重點就係美國宣佈縮表的同時,中國就玩降準去造新錢,呢場中美的搏奕,繼續令市場的呢個印錢派對以及通漲成本無止境咁運行落去。而且,美國講加息講縮表,係吹左好L多年,大家都預左,但係你表個月縮100億美金的同時,人行一下降準已經造番約6萬億的新錢出黎,理論上以一年計,兩者的威力差唔多,而香港又受惠於中國的經濟下,你諗下大陸的中小企借多左錢經濟又疑似會更熾熱的情況下,走資同發左的黎香港買樓,又係有一定的支持。


大環境令香港樓市撕去左縮表的陰影,股市向好又發左一班人,講番香港內部情況,林鄭所搞的乜屋物屋全部都係搞笑,無地你搞咩貨櫃屋果D都係得啖笑姐,政府房策仍然係束手無策,供應係唔會有乜變化。而最近半年個樓市其實可以話係平穏發展,價錢由三四月衝到高峰然後稍稍回軟同整固,及至而家十月其實個整固時間已經開始儲夠力,睇怕當D二手盤再消耗一輪,只等下一個導火線就會再次向上行。


唔信的話當然我無辦法,但有迹可尋的地方係其實呢排新盤已經係痴痴地線,康城一直都係將軍澳最遠最隔涉的地方,喂佢果口價其實係九龍可以任篤,開到咁貴一样有1300票,認真講我都唔知入票果D人諗乜,但any肥,有咁多人入就有咁多購買力,無計。而另一個盤屯門的park ville我又係嚇親,一房兩房的又係九龍價,基本上同之前太子深水埗果D小型發展商開的單幢樓價唔係差好多,不過呢家玩下gimmick開D咩大學生plan,但其實咪理,如果去到貨的,我真係可以講九龍的二手樓要劍指20000實呎先岩數,否則都反應唔到個地區差價。


購買力的強勢可以反映出市場的資金應該真係好多,多到D人盲中中唔理價照買D新盤,不過如果你話你感受唔到自己購買力強左,唔駛擔心,因為隊長都唔覺我多左錢,只因印錢造錢的第一二水係未流入你個袋但先流入左另一班受惠左的人先,所以有一班賺左第一水的人就可以亂買野都唔覺得錢係錢咁。然而,一個好深刻的感覺係,隊長睇住有一股好強的承租力不停係市場流入,市場的的確確好實在咁有源源不絕的實力承托住,因此我認為以今日的情況黎講,無論外圍,本地,以及樓市的實況都係好實在咁令個市向上煮緊,因此下一個浪的升勢條件相當成熟,不過隊長唔係話爆升三五七成咁,只係話今日的價好快就會變平,而未來個價會去到邊,就要睇市場的角力。



留言

  1. 政府係可見將來都唔會減辣,那怕沒有400萬樓做到9成按揭。

    回覆刪除
  2. 此留言已被作者移除。

    回覆刪除
  3. 你一直所講的升勢, 都是偏向一手樓, 但二手成交量就不斷跌, 當中所講的二手成交, 即使是升, 看來參考價值甚低, 對於二手投資者, 你有什麼忠告呢?

    回覆刪除
  4. 回看今天,隊長所言甚是,降準會令市場上的貨幣增加,不知隊長如何看印錢及降準帶來的影響?

    回覆刪除

發佈留言

此網誌的熱門文章

香港租樓故事 -- 女B版

DSE題三: 專精一事還是多元人生

被退休的CEO