屎忽痕

呢個世界有一樣野，係有錢之後就會發生的，呢样野就係叫做屎忽痕。症狀就係當你累積有多過你平時洗費之後的一定金額後，人就會屎忽好痕咁諗D野搞搵D野買下投資下咁，而呢樣野往往都係種下輸錢的種子。


屎忽痕最大的問題係，你因為有閒錢而要為呢筆閒錢搵出路，所以出發點係好主觀咁要搵野買，亦即係唔買唔安樂。而唔買唔安樂的情況下，好容易就搵主動去搵D項目同股票番黎好主動咁研究或甚至唔研究，然後就作下一個買的決定，呢一個決定就係因為成日要諗住買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買買，因此，好多人會可能鬆懈左，令自己無左咁多介心，令自己接受更低回報甚至係唔合理回報的項目，到最後就輸錢離場。


令隊長寫呢篇文的原因係因為隊長有朋友最近儲左三幾十萬，其實一直以黎佢係乜投資都無，但就正正因為有左筆錢，佢就開始屎忽痕周圍問人有乜好買，然後就有唔同的人比冧把佢，比意見佢買外國樓之類芸芸，而以隊長認識的佢，我認為佢係完全零概念，所以做唔到任何合理的決定，及至前排佢叫我幫佢入隻股票，佢好疑似好專業咁同我講話幾多幾多錢有基金入貨，入左所以要跟車一定有好消息跟尾，而係佢連股票戶口都無的情況下，我拒絕幫佢，原因唔係我唔想幫，而係我覺得你屎忽痕買的，不如唔好買。


其實今時今日的環球市場，幾乎隊長認為全部野都係貴得好交關，接近無野值得投資。當然每個人睇的唔同，如我可能要睇長時間，你可能楂半個鐘就要沽出去，咁係超短線的情況下，你唔需要掌握任何消息同理性分析，只要你捉緊個現金流，有錢不停流入某一股票，你的確可以賺到錢，之不過咁样玩其實同賭波賭馬無分別姐。


而隊長係投資的路上，接下來其實會做的就係不買也不賣，但又講番呢個策略好睇每個人的倉位。如果呢家樓市大升，其實隊長一样受惠，而如果要跌，目前隊長都唔會有影響，只係賺唔到多一注　(15%真係好串)，但只要跌的話唔入肉，根本係一個不敗的位。但隊長距離呢個不敗位，我自己認為仲有兩三年時間，之後就可以進入下一個境界，但到呢個境界前，其實真係唔太需要任何的分析，要成功只需要一個心法，就係唔好屎忽痕亂買野就足夠了。


呢個玩法又唔係人人可以玩，舉個例你乜都無係手的話，比如你成日諗住等樓大跌先黎買，咁Sorry，無人係神，無人知幾時跌，但我知如果升或橫行，你如果仲租緊樓的就一定係輸租，咁個玩法係你要去搏我完全明白。但如果你都有貨係手，升又嬴跌就再入，咁呢家個市就真係唔駛太積極入任何野，保留實力等待機會已經好足夠。


隊長唔知幾時係下一個機會，但為左準備下一個機會來臨時有錢有野玩，接下來的日子就係唔好屎忽痕就可以了。