轉按的不快故事 (中)

到左收工時間，中銀呢位小姐繼續無影，我就問佢收到Email文件未，唔追佢又唔會理我，咁佢終於捨得講話佢收到啦，然後佢今次又好巴閉咁同我講話再問左係估7.3M最盡，然後好禮貌咁問我「咁你仲做唔做」。我唔識得表達比各位聽果種感覺，但我可以話比你聽佢個語音的語氣係禮貌地好似想唔做你生意咁果隻，最好你就答唔做佢就拍屁股收工咁，我心諗點解下下都要我追你先肯反應都可能解釋到佢生意可能太好唔得閒招呼我地呢D老散，咁但係係我立場而言，一來都填晒form，二來又得兩間Bank，三來我計埋另一隻case勉強岩岩好唔駛抬錢去做，所以我就會照做啦，講一句就有我點解唔做，傻的嗎？如是者佢就又OK攞TU。


黎到呢度其實我都明佢地要時間整理文件，所以我星期二晚confirm去照Go，我都無煩過佢，直到星期四收工時間，即佢都應該叫做有兩整個工作日去處理佢的野，我先再問一問佢我的文件以及供款有無問題，佢好快就打電話覆我然後就問我第一個問題，佢話佢見到有一個mortgage問我係咪無比文件佢，我話係，而果個mortgage係已經唔存在，因為我已經賣走左，我係最尾一個Email已經寫得好清楚（好明顯佢無睇野）。而之後佢又問我係咪另外有一間元朗的物業無比文件佢，當然我唔係對住我部私人電腦，我話我真係答唔到佢，我相信我就一定有Scan，但有無send漏左就唔敢肯定，（特別係我要切做幾個5Mb有無漏真係唔敢講)，但我話我每個file的名都寫得好清楚係乜來，舉例我會寫 - HSBC Mortgage Repayment Schedule (Amoy)咁样，你print晒出黎就難搵，但你開電腦就好易搵，你話無我就補番比你都得，但好明顯佢又係懶搵而我又唔係部電腦面前大家死結。


而再接落黎佢就話我的總收入呢，係X呢個數，咁我一聽就話無理由，應該係X+1咁講啦，無理由咁細，咁佢話佢地銀行租金係要打七折，咁呢下我絕對明白打折係一個慣常手續，但講野點解總係要含糊不清呢，如果我係佢我會話你總收入係X+1，但打七折後就係X咁，但點都好我已經對呢位人仕的能力同質素累積左好多不滿，而佢之後就係話如果按X黎計呢家得40%無款呢，係借唔到呢個mortgage。去到呢個位我真係開始黎料，我一方面同佢講我話呢其實你有眼見我呢個係轉按，點解同一條例之前我借得呢家我借唔到呢，肯定已經要動動腦筋去諗而唔係直接一句唔得。二就係更明顯的係，我賣走左其中一間供款左成皮野，理論上應該之前計到呢家更加鬆動，當然如果你係代表中銀話你唔借我係完全無問題，但更重要的諗法係心裡覺得佢係無經驗又唔想做所以話唔得，而我相信如果想做生意的，係未到諗到最後一步都唔會話唔得囉。


而點解我知佢未諗盡呢，因為佢呢家又識得問我，係咪有Bonus / Commission / Double paid果D野，我話係，叫佢睇下我D糧單稅單，咁佢又話啦如果係的話就要我提供兩年的糧單同稅單，我話無問題，但我岩岩轉左工一年多，糧單係兩間公司，佢又話中銀要求係一間公司兩年。Ok，呢下我明白，但更大的問題係，佢去到呢個位又好似好開心咁因為又搵到個位turn down我唔駛跟落去，但以隊長的經驗其實都有三兩招可以去做的但佢一係就無經驗一係就唔想做成日都想將個conversation推向終點，我覺得再同佢咁玩我都好吃力，與其再糾纏我不如去番東亞算，所以我都收佢皮無謂大家再磨落去。


呢件事我真係唔知呢位中銀小姐咩料子，但我更加唔明的係點解經絡按揭會介紹一個咁样的mortgage人比我。之前的經驗係就算再好生意再忙都會盡力去做，但呢個中銀的人我只係感到佢由頭到尾都好Ｌ唔想做生意，咁我心諗其實你咁唔想做你做乜春要覆我姐，你一早唔接咪算囉。


為左表示我的不滿，我又去Whatsapp番話中銀條女唔想做的感覺比番經絡J小姐知，咁J小姐係今朝零晨時間先黎覆我話緊係唔係唔想做我生意之類的必然人肉錄音機答法，然后佢話佢有搵三四間銀行搵過我，話應該唔止兩間，仲話應該有send過比我話比我知邊間Bank會搵我之類，我今朝答番佢我話Sorry我無收過任何野，心諗基本上其實你都早已消失得無影無蹤，當然可以做好Ｄ的係其實真係send番個list來比我唔好單向係銀行搵我，我都可以搵番個銀行contact會好D，但之前無事無幹我都接受佢果套，但呢家得兩間bank介紹，一間仲好唔想做，我心諗咁我搵你介紹做咩呢？我不如唔好嘥氣直接搵我識的東亞人好過啦，起碼谷少D氣。


事情未完結，但我亦有聯絡經絡按揭的marketing反映呢件事，今日八號風球無人理我，似乎我有我不滿，佢有佢放假，但我肯定J小姐係見到我今朝的投訴，因為一如既往又係籃剔一堆，但沒有回覆，今次經絡同中銀，真係令我好失望。



故事唔知完未，但我知經絡的人會睇我呢個Blog，我估計應該會有跟進，而如果無的話就仲得意，悉目以待。