生生不息


作為一個收租佬,其中一個最關鍵又最引人入勝的,就係生生不息的租金。相對比起一d沒有息率回報的項目如黃金白銀等等之類的東西,有息收的項目能提供好多現金流,呢個亦係點開發被動收入的重要環節。


自去年隊長都只係以持有操作樓盤後,至今年的唯一大動作就係買入收息股。而家市場上有好多好多好多股都有起碼6厘回報,實在比起樓有更吸引的空間。之前已經講過好多,但再輕輕計一條簡單數,如果買樓用而家5成首期賺3.5%左右的租金回報,減晒管理費蒫餉好大機會都係3.2%左右,以2倍的槓桿上去即係大約賺6.4%的回報,但又要減番按揭息率,即總數可能都係得果4-5厘回報,仲要孭左條數上身的情況下,股票現市況係吸引好多,因為賺入成本相對平好多,又唔駛裝修,流動性又高等等。


當然呢個決定係建基於今日股價都係殘的情況下先合理,但假使間如果股同樓都係正常水平的話,慢慢吸引力就會返回樓市,所以係目前股市低沉的情況下,樓市都未必能好轉,唯一見好的係股市已經由19000上到21400水平,之前做左個雙底,希望再突破埋22000,收窄番個派息回報同租金回報的距離,穏定埋市況,下半年樓市可能就會重拾動力。


不過,買股的其中一點隊長覺得都幾正的原素,係派息除淨後,過番一段時間大家就唔會再記得派息除左淨的一舊肉,亦即係個息派比你好似係FREE左出黎咁。幻想一下,你以前講匯豐70元,半年後派左兩三次息,但有好多人又係講70元,其實已經係兩回事,實際佢可能已經係75元,但有5元係過去分幾次派左息比你,你舊本金其實無變,但你銀行就會多左一舊錢。咁多年黎,其實最resilent的其中一個股票應該都係媒氣,過去咁多年成日派紅股又派息,睇佢近呢幾年成日好似十零蚊十零蚊,如果你唔小心楂住佢睇股價可能唔覺得點样,但係佢年年都差唔多十送一紅股咁濟比你,你可能楂左佢5年果D,股價無乜大升跌但你係你手上的股份真係多左好多,連埋股市一年真係十幾個% 回報,真係又唔講少。


但講到咁样你又可能話點解隊長又建議買樓唔買股呢?當然其中一個最大問題係你手上的資金有幾多。係無槓桿的情況下,作為一般市民你買得幾多錢股票?個人相信普通人應該好難有100萬倉掛,甚至好多人應該都無50萬倉。個人設計打工仔十零廿萬股票就可能好普遍,再多的就算有錢都未必會買晒。好啦,比你楂住廿萬好味,一年執10% 20%,相信好多人都會覺得唔夠喉,但叫你買一百幾十萬股票咩?老實講唔好理個風險,叫普通人買完一球股票訓得著都比較難,當然實力派有錢人除外。再者,又係果句,隊長唔太建議玩股票係因為大部份時間我都唔知係咪入市位定出市位,因為我都唔係太識咩數據分析的野,所以換句話說係9成時間下買同唔買,以及買完個走勢係點,隊長都係靠估。


咁今次又有咩唔同?咪真係因為今次有小小似2007年由32000點直插的感覺囉。以我地香港人的智慧,大家都知係股災後買貨係執錢的時機,而隊長操作MPF都有類似的思維,就係一年總有大約兩次高位兩次低位,而今年似乎19000點都已經係出現左一個低位,不過高位係未出現,唔用數據只憑炒家的心態去諗,每年大戶都一定要低買高賣,先至會有回報,咁如果你認為低位出現了,而且殘到你唔信的話,咁點解唔買?所以隊長都只係咁样瘋狂入市。


至於結果會點,當然無人知,但希望唔會行錯路啦。

留言

  1. 我的確在低位買左一些股票,問題是,未到高位已賣左!賺得唔多。我在相對高位買左樓,但一直出租,賺得比股票多很多。流動性低的缺點卻成為賺錢的原因;流動性高的優點反成為我賺錢的障礙。一切都因人而異。

    回覆刪除
  2. 十分認同,流動性高,容易反情㥩影響而亂出入.

    回覆刪除
  3. 股市要求的心理質素比樓要高得多!

    回覆刪除
  4. 所以我覺得以樓為主,股票為輻,比較適合。

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力