股票大時代2



大約四個月前,隊長寫左一篇股票大時代,當時恆指氣勢如虹咁直衝至28000,勁多人大賺特賺,當然又有好多咩少年股神同全職炒股的故事出現。時而世易,四個月后的今日恆指跌成千點至21251點,期指呢家已經跌穿21000,今年年初的升幅全部唔見晒再跌突,如果你係槓桿孖展王的話呢家一係賺到仆街,一係輸到去IFC。


今次大跌市,初時似係股市調整,但后來越跌越急,及至中國突然貶值,似是告知全世界連中國平時話可以救市的國家都唔掂,全世界的經濟已經再無樂土,避險的情縮高漲,呢家全球股市彈都唔彈,可以話係一個巧合,但唔知點解隊長覺得似係一個劇本多點。


從來股市有升有跌都係一件再普通不過的事,但係由24000炒至28000,果一浸資金唔會係一個巧合,一定係有人儲夠貨要郁手先可以兩三個月內炒上。而呢家掟番落黎,一般調整兩成都好勁,但呢家似係掟突,有心人要執貨真係開心到笑。不過最勁係連彈唔彈下,而岩岩人仔又想貶值,睇黎呢家由高位跌左6000點,都未見到風眼,不過隊長心急,已經忍唔住入市,而且已有損手,做L左勇士。


隊長入市的原因有幾個,一方面股市的派息真係吸引到不得了,之前好多股都係4-5厘回報,但你今日見到內銀都普遍有6.5%回報,匯豐6.2%,呢D收益率已經可以拍得住REITS。不過,最驚的當然係黎一個股災,然后間間公司都報紅,咁呢D收益率可以全線下跌,條數就未必係咁計,所以都有小小賭的成份,希望風暴快D過去。


另一方面,隊長只係計自己數,因為呢家買一層樓,當你買350萬,首期要175萬之餘,隊長仲要比157500 DSD + 35000佣金,即係基本上都硬輸20萬成本左右,仲未計要裝修果D錢。本來隊長真係對買股無乜興趣,但今時今日的股票跌到仆街的時侯,如果唔槓桿唔孖展,你預20萬緩衝去買,當你買100萬,你要輸多20%先同買樓打個和,但係一個殘價的股價黎睇,個人認為係抵搏同值搏,問題只係你有無能力楂過呢個風暴而已。


之前隊長唔建議人買股,其中一個最主要的原因係波幅同心理的角力。好多人買股,嬴又唔識走,輸就走唔切,高買低賣,嬴面極低。講真,隊長都唔係咩股票高手,亦唔得閒去研究邊間公司好,但純碎知道你買大公司,或者大內銀,你信佢做數都做到唔會出事比你睇,又唔孖展上去,其實已經係52週低位,點解唔入?不過講番樓同股的問題,始終就係好多人唔識進退,所以股票係輸錢多,而且買得大輸得大。睇呢段野的人,可能你係點滴在心頭,知道隊長講乜,又或者你笑鳩我話我井底蛙唔知你賺大錢,不過作為一個有幾千讀者的blogger,我可以好肯定買樓有9成人係賺緊錢,但今次跌事有買股的9成人都係輸錢,所以一直唔讚成,就係唔想咁多人輸錢。


今日我認為股已經好抵買,但係係咪已經見底可能好大機會係未,不過老實講幾時係底你又知唔知先,唔知的話計岩數入番多少平野都係一件考眼光的事。而且,其實今時今日中國玩貶值,隊長認為呢家係無啦啦迫番美國無得加息之餘,隨時為左救市要QE4番出黎,如果唔係睇黎呢家個股市只係再死落去,到時好好好大機會唔駛一星期,最弱的歐洲一定叫晒救命爆大穫。


所以最后一定有人問會唔會樓市被隊冧,不過今日美孚又創新高了,但呢D都唔可以做指標,即管睇下會唔會美國今年推遲加息(不過隊長一直都認為加唔到的今年),同埋會唔會再Surprise個市場黎個QE4,咁就會更明朗。








留言

  1. 原本我都預左十二月會加息,經此一役真係不得不佩服聯儲局的部署同expectation management ge 能力。

    回覆刪除
  2. 打從人字眨值一刻。美國已經冇得加息

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力