舊區新樓新動力

過去幾年由於政府地皮已經乾涸，不少係市區插針的蚊型地或重建項目相繼推出成單幢豪宅，尤以九龍舊區一帶為主，而呢D樓就慢慢在舊區重建的交替中沖淡左那老區的味道，所以單幢舊區樓是否一個可以吸納的項目呢？


舊區單幢樓主要出現係港島的東區或中西區，不過更集中的係九龍西以大角咀為頭，一路起到去深水埗同長沙灣。大角咀一帶的單幢有型品星寓為首，一路向橫就有奧朗奧栢i-home果堆，去到另一邊的就有幾支信和的One New York, One madison,海峯果堆樓，當然最近又有恆基的曉尚同曉悅亦相當火熱，但最開心的就係喜雅的業主，因為一轉手就執百幾二百，相當和味，所以未來如喜字輩的樓是否都諗得過呢？


當然如果要探討任何野買唔買得過，第一件事走唔甩就係價錢，所以如果第二個喜字輩的盤推出黎係明顯進取左，即係新買家要比多D premium去買的話，咁就會減少左個吸引力。不過隊長最近認為有一個新的angle必須重新考慮，因為你永遠唔知幾時舊區會大變身，而當中一個例子就係灣仔皇后大道東一帶，由合和中心到PP3期突然帶旺，本來係舊樓林立的區，突然搖身一變變左做鬼佬商業區，所以如尚翹峰啊嘉薈軒果D單幢豪宅亦因舊區大變身而變得超級貴。


要成功變身，當然要有大財團投資先得，而呢样野又唔係話咁易就有。不過，organic的變身的話，其實可以幻想一下如果你十年前話大角咀（唔計奧運先），都只係一個舊區。但時至今日大角咀近番型品果帶已經因為有五六七支單幢新樓的配合而有一Ｄ變身的情況出現緊，好明顯當中一D有品味特色的歺廳已經插旗，配合當區因為買新樓而入去的年輕人消費，慢慢新的年輕動力就會注入舊區，時間同單幢越多，舊區的形象就有可能慢慢破滅，樓價亦會隨之而反映。


另一個例子就係元朗的雞地一帶，十年前yoho 1期還是剛落成不久，仲未有西鉄，雞地只係一個好普通的元朗邊垂地段，相當於今日的元朗公園一帶的地段。但隨住Yoho Midtown落成，注入左新動力，然后又有尚悅啊，寓88，尚豪庭咁，人流同后生仔的動力注入，加上西鉄效應，好明顯元朗雞地的鋪頭同消費都已經大變身，老實講有時唔講都唔知自己係元朗消費，因為雞地食個茶歺廳都可以去你50蚊，呢個亦係印證舊區翻身的例子。


所以可以睇到，越多新樓一支支咁落成的地區，往往就帶一班新的年輕客人進駐，然后社區就有機會重建動力，樓價亦有機會追回落后。因此如果以呢個方向黎睇，未來的舊區重建其實好著重於大角咀／深水埗／長沙灣一帶，而且其實呢D區份係今日的交通網絡下其實相當方便，只係由於之前欠缺發展同新樓而落后。但正正係樓齡高，重建的機會就變大，新的動力就有機會注入，如果要尋寶，不防可以係呢D區份執下洋樓仔玩下亦未嘗不可。