失敗

前排同朋友篤波時，其中一個朋友的世叔伯都係社會相對成功的人仕，而身為富二代的佢亦要孭起公司的命運，所以身負重任下，佢有時都會以其他人失敗的例子去提醒自己唔好犯同样的錯誤。而隊長其實亦有類似的諗法，因為我都經常諗我唔太會再接受到自己由頭黎過，所以能夠打起個江山，亦要識得唔好敗左個江山先係正貨。


因此，隊長都不其言問左朋友講關於成功人仕如何失敗的故事。第一個故事，係一位90年代的紡織業大班，據說佢應該唔係老闆，不過成功時期應該有好幾層太古城楂手，再有好幾架賓士，而每日的工作只係回公司西遊，然后夜晚就去風月場所燒錢。


90年代的紡織業其實係香港最黃金時期，當然我地幾條蝦毛無人知佢搵幾錢，不過以朋友的判斷，呢位人兄都可能以接近千萬年收入，記住這是90年代的收入。當然你可能會話乜野老闆會請條友比成千萬佢，你估佢係霍建寧咩？無錯，我個人估計都應該唔係年薪千万，不過又唔代表佢實際無呢個數，而D錢係邊度黎？你懂的。


所以正所謂Easy Come Easy Go，每晚去尖沙咀當時還是夜場林立的夜店，據聞佢生日比貼士係真係好似喜劇之王個初戀咁，攞住一疊疊一千蚊去派，講聲生日快樂你就攞一張走，呢個就係那時聲色犬馬的年代。


可惜好景不常，一剎那的光輝亦唔係永恆，一落千仗的生意令佢收入大減而且中年失業。據說幾層的太古城亦而家只剩下一間，好就好在爛船仲有三斤釘，死就死唔去，不過對比十幾二十年的風光日子，而家就已經變得暗淡無色了。


而另一個例子，亦係一位大班，唔同之處就係呢位大班月入高到從不考慮買樓。係90年代，亦願意以12萬月租租用山頂附近的獨立屋自住。不過又故事總係不停以同一情節發生，呢位大班亦係97年后中年失業，不過為免家人擔心以及要面子，失業后繼續以積蓄租住山頂獨立屋多幾年，奈何經濟並沒有令佢番身的時機，幾年后積蓄亦粍盡，大層搬細屋呢個佢唔想出現的情節亦始終要出現。


兩個故事，其實多多少少都有一個共通點，就係係風光的時間並沒有好好運用，而且理財能力極差，因此遇到低潮的時間就無力反抗。試諗下如果以上述兩位仁兄將當然洗的錢full paid買樓，利用租金收入黎生活，再控制一下自己的早晚要控制的洗費，要立於不敗之地其實唔難。可惜人生只有一次，錯過了就是錯過了，殘酷的現實總是會折磨人，所以做人要謹記係好天的時候要斬埋落雨柴，否則天氣一變時，受害的只係自己而已。