操盤實例 -- 愉景灣投資篇

致80后求生隊長，

本人有關置業問題想聽聽閣下意見。
基本資料：
本人收入：$40K
太太收入：$27K
我兩均沒持有物業，現租住一南區單位實用 420sqft 兩房單位 月租$13K.
由於早年過度消費， 現在每月供$16K私人貸款剩餘36期.

現手持可用資金：$500K

由於小孩剛出生，本人有意於愉景灣購買兩房單位自用。
想問問閣下從投資角度分析對於愉景灣這地方是否一個進可攻退可守之地點？
另外以我兩公婆現時之財務狀況，應如上會方為最理想方案？

十分感謝！！！！
---------------------------------------------------------------------------------------------------------

一睇你個case最大問題係你個私人貸款，你呢個16K仲剩餘36期的野，會完全頂住左你地做按揭的能力，但由於你無講名係under邊個個名，所以我希望你地只係一個人名的貸款，但如果唔係的話，就睇下搵過間銀行又做過一個人名的貸款去蓋左佢先會好D，用你個名可能個息就平小小，但用你太太就怕你之后借錢上會唔夠額，不過如果鋪排買樓就最好叫你太太一個人頂晒條數會好D。


愉景灣最大的問題當然就係交通，因為正常人係楂唔到實入去焗住坐船或者係東涌轉巴士，但愉景灣就環境清幽係一件不爭的事實。但如果只係用投資角度，就要計埋前景。


由於交通問題，愉景灣係一個好自成一角的地方，換個角度即係你住開的人就會係果度再諗下，但唔係住開的人未必中意下下坐船出入，呢個交通的問題多多少少會限制左資金的流入，亦即係話愉景灣會跑輸大市。但平買平賣，呢D野我又覺得唔係大問題，只係如果純睇現狀投資，我就未必會搞愉景灣。


如果你話投資前景就又係另一件事，一方面港朱澳大橋通車應該會帶旺番小小大璵山一帶的樓盤，不過又去番交通問題上，你楂車去唔到，即係通左車都唔關佢事，無理由咁硬膠大陸通左車一路楂去中環再坐船掛（又或煩到春咁停車係東涌再坐巴士入去咁煩？）？所以港珠澳大橋通車可能只會帶旺東涌未必帶到愉景灣。


再睇落去就係CY搞咩人工島，如果係堅搞，然后東接西環，西接大璵山再打通愉景灣呢，咁成件事就唔同晒，不過你要考慮搞得黎填得黎都十年八載，十年八載先升可能出面三五年已經升鬼左，搞黎做咩？


總括黎講，隊長就唔會買，但唔代表佢唔升喎，只係如果你升我又升，我點解唔買D我認為有機會升多D的野又嬴面大D的野呢?