何不湯房?


係好多個唔同的讀者來信中,經常有人問隊長我關於湯房的意見,但我都偏向唔答,其實亦有我個人的想法,所以今日特別發一篇幅去講下我對湯房的睇法。


湯房故名思議,就係將一間屋湯開數間房,每間房細細間連埋個浴室,然后最好就做到分埋水电錶咁就very good,然后你就按每間房再同獨立租客傾租約。湯房的至高境界,就係用到個則好盡咁,能夠一開盡多咁你就發到豬西,回報就相當之和味,據悉以高峰期計有D人湯到可以15%回報都仲得,而普通湯都係咁易7-10%回報,對比你買間普通樓租4%左右,差唔多多成倍回報,呢個係我相信湯房最吸引人去做的主因。


先勿論湯房係咪合法呢一件事,無可否認湯房的市場好大,但係為左谷大個回報,係揀樓方面湯房的揀樓條件同隊長本身揀樓已經有多少出入。湯房一般會揀針對舊樓大實用面積的地方去做,甚至唐樓同工廈都有人做。追開我個Blog的讀者都知我偏向叫人買大屋苑買流通量,唐樓同工廈堅唔係我杯茶。


再者,唐樓同工廈的按揭又有所不同,而唐樓或舊樓的隠藏維修之類的問題好多,買得的話,隊長我呢種人一定睇唔過眼盡執好佢,對比番有一D無良心的人,話之你漏水,話之你屎渠已經梅爛,話之你部冷氣係咪得番三幾個月就虧,話之你安全有無問題,總之做就一定用最cheap最cheap的成本去做,呢样野隊長自己又過唔到人。所以如果隊長做湯房,我可能成本會高過D無良心的仆街,但我又唔夠仆街去唔整好D野比人。所以係投入成本的時候,隊長可能搞一搞就用左40-50萬去做cheap人10-20萬的工程,咁就無謂。


湯房另一個問題係我堅唔想去搵湯房客。老實講,住得湯房的,你預左租客的質素係咩人,你唔好預左佢地身光頸靚,如果比你預著個干淨衛生的,都叫做托賴了。租得湯房就咩人都有,麻煩友一間拖你租,你點搞?突然消失左唔見左人的租客,你點算?D仆街原來住到污污漕漕搞到其他租客投訴,你點處理?一間人地一間三口無工開,係你面前喊苦喊忽,你點做?或者你話隊長諗得太多,但如果隊長我全做湯房的話,我好易就有20-30間湯房,預到呢D問題又有咩奇怪?


其實,隊長係租樓出去的早期就有一個好深的体驗,因為曾經有兩批黎睇樓的租客都係一個媽媽帶住個小朋友,佢地為左小朋友住得好D所以都盡量希望租一個完整的細單位比佢地,那怕租金可能係佢地收入一半,都在所不計。老實講,隊長係一個好有惻隱之心的人,但我亦清楚知道我做得收租公,就當呢個係一門生意,我好難又做善長又想搵最多的錢,呢样野係一個好大的衝突,試想想一間你話加租個女人係你面前喊,你點算?


所以隊長的目標好清晰,就係收租就收租,賺就賺D正常有能力的人錢,唔好搞複雜野,麻煩野,更加唔好賺低收入人仕錢。套用另外一個網絡作家的一句說話,有時當你有咁上下能力的時候,你就唔想好似剝削緊比你低層的人的生活黎向上爬,呢個亦係我的宗旨。


也許有一日,隊長都會做湯房,不過到時我好大機會係以慈善為主題,幫助有需要的人,希望呢样野係我財務自由的時間下可以實現。

留言

  1. 你好,我讀過你好幾篇文,24歲但我已好清晰自己要上車。我有啲特殊,做補習part time但每月baseline1.4K走唔甩,死慳死抵每月儲到4-10K不等,加埋定期資金我相信有7-8萬倒。我已好明白我想用9成買細樓,儲緊錢,目標兩年內上。我知你好推崇新界樓,因為平。我因為同一原因,加埋鍾意環境清幽嘅地方相中離島。但始終未買過,想知你對離島樓點睇,又會唔會之後想換大樓會好難?
    另外想多謝你嘅文章。六月計劃會放幾日假輕鬆,去就要去不過為咗儲錢我決定唔會去日本去台灣算了。我真心唔想做窮中產(屋企有一個)。謝!

    回覆刪除
    回覆
    1. 離島當渡假屋就OK, 呢家一定唔會考慮.

      你如果part time做9成,小心上會時有好多野煩.

      刪除
    2. 即係話如果有打算轉大屋就始終揀返新界好?(我絕對會為咗有得轉會轉軚)
      Part time 9成係咪煩俾銀行質我還款能力?我除咗show糧單表明我收入算穩定外仲有咩辦法?
      大感激。

      刪除
    3. 揀新界,離島流通量低,如果村屋估價/按揭又好多不足之處,你仲要part time工作買樓=自殺。

      Part time 9成,我真係未試過,HKMC好苛刻,一間當你無收入你就訓係度。

      刪除
    4. 明白了。我會想辦法,有必要時以屋企人名義借實際我俾錢。

      感謝!

      刪除
  2. BTW補返句,睇完你對湯房嘅睇法,又解開咗我對買樓放租嘅諗法。我本擔心會好似好剝削,但見你可以裝修到靚一靚好似藝術品咁租出去,錢又袋得心安理德,令我又多個諗頭。非常欣賞你嘅膽識同骨氣。我未必句句認同你但我亦獲益良多。facebook已like,大感謝!

    回覆刪除
  3. 敬重你 "有時當你有咁上下能力的時候,你就唔想好似剝削緊比你低層的人的生活黎向上爬,呢個亦係我的宗旨。"
    亦希望多D人做到"取自社會, 貢獻社會"!
    共勉之

    回覆刪除
  4. 無話剝削唔剝削,無人搵枝槍迫啲劏房客租住。無人搞劏房佢哋要瞓街仲比食環搞。

    回覆刪除
  5. 多人搞劏房起碼增多供應減低租金,其實對佢哋先有利。當然收租麻煩係真。

    回覆刪除
  6. 隊長的分享與睇法都好好,,
    有時當你有咁上下能力的時候,你就唔想好似剝削緊比你低層的人的生活黎向上爬,呢個亦係我的宗旨。
    本人也一樣,,
    生活在香港已經唔容易,,
    這些低階層苦況的人真係好難忍心去湯佢地的錢,,
    多幾個好似版主咁有憐憫的財主,,
    香港也許會好些,,
    互勉之...
    cleverpeople...

    回覆刪除
  7. 其實劏房係好多國際大都會都會有, 英國, 法國, 東京etc..就係因為多人想住市區而無足夠供應, 所以有人寧願住細d, 但係又唔想同人合租, 因為會好煩, 所以先有呢d 劏房, 好處係又可以好似合租, 但係又有私隱....如果你係呢d 租客, 又無劏房住, 咁你會點呢...做業主既, 我覺得要比個正正常常既單位人地住已經做左佢本份....

    回覆刪除
  8. like your attitude x 2
    不過劏房唔一定系壞事.
    例如有好多人會租公司附近啲劏房, 一個人住唔駛大, 放便又平
    而且多啲人做劏房會令劏房租金平啲. 俾人多啲選擇

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力