按揭下扭曲的樓市

近日抽起條荕有嫌而家住的地方唔夠大，所以開始萌生搬大屋的念頭，但背后又勾起好多唔同的諗法。

從按揭方面，而家我留意的都係接近一千萬上下的舊樓，因為如果太細的搬黎又無用，太大的我又應該食唔起，新樓又唔實用（我都住近半新），所以一千萬上落的就差唔多，呢個月都睇左好幾間，感覺到果種空間感真係唔同，不過大還大，樓底就好矮，得八呎幾九呎，感覺又唔係話咁舒服。

係睇樓之后，經紀自不然會follow up問下呢样果样，其實我最大的concern就係按揭。呢家最麻煩係修緊按揭之后，1000萬最多借500萬，即係我要手頭最少有500萬現金，仲未計DSD (即又去多70萬厘印+DSD)，講真我攞住咁多cash的話就晨早買多幾間secret project的樓收租，點會搞成咁。

一諗到呢度，我又會覺得如果真係搬大屋，係現階段下又同我的理念背道而馳，畢竟我係想話以租養樓咁養過十年八載先開始improve生活，等到時無咁大壓力，不過如果呢家直接咁搬大屋的話，即係又會變相做番樓奴，成件事都唔係咁實際。

不過其實我本身都有后著，因為我住緊個單位隔黎個單位都係我的，一早買樓果時就預左打通，呢家只係放住租先，某程度上打通左都會多番300呎左右的空間，其實都叫做好唔錯。不過，諗野就會諗埋其實好唔好不如等SSD完就賣左佢先，以套現的錢出黎掟落去secret project提高收租回報，等自己係cash flow度又improve多少少。做呢件事的則需要一個前設，就係我一定會於3-5年搬離現居，要放棄打通變大的機會。

不過突然又諗緊，呢家D一房新樓咁好賣咁好價，反而如果趁好價賣左佢會唔會又有其他野諗？始終我開始認為一D兩房單位其實都好落后，就算舊錢唔買落去secret project，直接買間東九龍如淘大得寶的兩房，扑中件350-380萬的野，都可能係一個option，始終果邊的兩房潛力，以現價計我覺得都仲有20-30%上升的空間，呢個我覺得又係扭曲左的按揭計劃對一房兩房的眷顧。

不過一房已經受惠太耐，相反呢家我見到好多一房價高層單位，已經係兩房的低層單位價錢，升幅有點已經有點過火位，估此我認為要摶就應該摶番D兩房的單位先係上算。

好多唔同的options呢家係腦海入面交戰，不過大前題就係點样將現有的portfolio主題改變，究竟係以完全唔駛比錢供樓為主題，定係開始享受生活為主題，都會令我的操盤需要 re-balance。

點都好，呢期開始又同番D AA放風做野，不過樓市真係好靜，唔單止係成交，就算值得討論的新聞都差小小。反而我期待的係有無D疑似吹淡的新聞，睇下會唔會有機會執到荀野先.