呢個月，又懶，又忙，所以唔係成日寫文章，而個樓市就神奇地硬淨，講的就係貿易戰下，股市就插到HIHI，但係樓市就繼續硬淨，當然有人又話劈價成交，但亦有報導指出好多樓都係破頂中，而CCL亦準備再闖歷史高位。 股樓唔同步，可以解釋為一係就股市先行一步，樓市遲早跟住跌埋一份，又或者樓市其實真係反映到供求的狀態，不被短期的信心打擊。當然，貿易戰呢家只係開頭，無人知打幾耐，所以實体經濟並未影響到浮現個問題。係貿易戰下，其實有兩個動力係對抗緊，一個就係中美兩大國都會繼續實行低息同寬鬆的貨幣政策，以助企業對抗未來六至十二個月後貿易戰所帶來的影響。而呢個政府政策，其實會極有利樓市，因為龐大的遊資並唔係話會全部流入實體經濟裡的實業，部份的係會攞左黎炒作，而呢D炒作的資金就會對樓市繼續有強大的正面作用。 負面的因素係呢家打貿易戰只係開始，好多商家都未硬食個衝擊，就以華為黎講，基本上唔好意為死就死華為，而其實華為的供應商都好頭痕，幻想一下你出開貨比華為的呢家點算？美資的唔比出貨，全年業績好多都大有影響，無計，大啊嘛。你係中資以為無事照出貨咩？太天真啦，呢家正所謂出又死唔出又死。就比如講華為手機黎講，你出幾個月貨比佢，但都仲要賭華為做唔做到一部手機出黎賣！如果佢賣唔到手機，或者半年一年後先做到，咁你可能壓住三四個月的資金係大量的貨上面，分分鐘上億元以華花的量，咁呢家華為會唔會執呢？我唔知，但我只知如果一間公司突然停產再賣唔出部手機，個現金流一定係仆晒街，係仆到應一應，而如果華為搞唔掂Ｄ芯片，咁好大機會都會逐個業務破產，咁搞法就火燒連環船，一個華為倒下可能就有幾十個大企業陪葬（唔死都要大栽員），然后就係大企業的供應商都出事，一個燒一個，當然內銀亦會好大穫。最大問題係，你就當肯借錢，係邊度搵番個華為咁大間的企業去填補番個鎖售渠道，即係點搞都會燒一穫金的，而燒金的一定會大炒人，呢下對從未遇過任何金融大災難的祖國黎講，可能係一個trigger大爆的源頭, 到時誇行業咁爆煲的話, 香港首先一定難獨善其身, 而祖國落黎的買家除左大幅減少之外, 仲可能會要賣樓班師回朝, 所以都真係唔可以睇少呢單野。 所以就以上一正一負的力量黎講，呢家因負面力量未蒲出黎，所以樓市短期內仲可以幸免於難，不過再之後係點呢，就要睇阿爺點捉呢盤棋。然而，以祖國一貫要面的作風以為仲係一個未開放資本的社會黎講，救華...

香港股市係星期五重拾3萬點水平，星期五晚ADR就繼續上揚，新聞亦引述中美貿易戰將達成恊議，星期六的新盤成交暢旺到不得了，股樓係各方面都旺場下相當相當之有料到，二手都一样暢旺之餘，破頂成交開始已經不停出現，問題係呢一輪旺市會去到咩水位呢？ 如果以對上一個頂黎計，唔好理中原指數因為隊長一直都關注成個升市的起點，即係細價樓的樓價，上次黎講細價樓屋苑的入場價大約係去到530萬左右就停工，頂位就當然破晒600，而如果大家有聽過汪生提及過的龍市理論，即浪頂高於浪頂，浪底亦高於之前浪底的話，其實今次的旺市將極有可能將細價樓的入場費推升至530萬之上，而高牆就係600萬，所以好大機會今次升市就會挑戰全香港所有大屋苑細樓都600起跳為第一站。呢個係隊長的個人睇法，亦和汪生的龍市理論不謀而合。 然而，600萬的確係一面高牆，如果當真全面到呢個價位之時，香港樓市會係要回落，定係一下攻破，定係要拉鋸，真係好睇當時的氣氛環境。係呢一下黎睇，相信只有神先知到時會點，又或者政府會唔會出招搞D乜，之但係到時就會真係好考驗樓市的承托力，一方面就係睇資金係咪真係咁充裕，二來就係租金回報會唔會變得極不合理，即係如果600萬樓的租金回報都係極低時，極大的買樓成本會否令大量資金流向其他投資就真係唔敢講，不過如上一篇文章所講，車位將會受惠，而其他投資就可能連股票都會受惠，無他的，都係因為買樓成本高得離譜而導致其他投資相對變得吸引。 個人認為係呢段時間，自住要追上車的就真係要趕尾班車，而有樓係手的，其實亦該轉向其他資產，車位工廈都好都唔係問題。股市都係一個選擇，因為如果樓市個樽唔能夠裝住溢滿的水，可能會谷爆港股都未定，之前33000左右點數的頂總有一天要破，也許今個升浪在樓市見全面600時就會係over shoot破頂之時。 基本上，以上的論點隊長唔係話樓值得投資或股值得投資，反而車位目前還是稍稍偏落後左小小咁多但都唔係極吸引。但要了解個問題係大勢所趨你都無辦法，資金多，資產價值就會上升，甚至over shoot到唔知去左邊，全都係歸咎係個升勢上面。呢個升勢唔駛多，升到8-9月已經可以去到600之地，到時個市係點就再評估，但而家問我的話，我只係見到乜春都準備升升升。

首先利申，隊長我有車位，而如果你係話我主觀唱好車位的，呢篇文章唔好再閱讀落去。 然而，睇番今日的樓價，破頂破頂再破頂的新聞開始出現，以隊長呢幾年都有講開的主要細價屋苑，好多都已經反彈番去到舊年4月同期的高位，當然未去到話平均已經達致歷史最高的水平，不過離開舊年普遍屋苑過晒五球起跳計，已經慢慢湧晒上黎，而亦見偶有破600的成交了。 重提一下，係今時今日的按揭成數下，600萬一係面高牆，因為以上車客黎講，599萬同601萬的樓的首期，係差約120萬。當然，對於部份投資者黎講，無8成按揭黎計，如果唔係靠發展商的資助下，呢面牆就其實更高，因為除左你只可能借到一半按揭之外，有樓的投資者買多間就要比多15%稅，當你500萬樓，起碼攞250萬首期或以上再打你75萬稅，即係攞住3球幾野先好諗買多層樓收租，呢個係目前的情況，所以好多投資者都係人頭上動腦筋，而用盡人頭後應有好多中小型的投資者係唔會再考慮買樓收租的了。 如果你係淡友，一定會話喂咁樓咪跌囉無人買。錯啦，不過呢度可以拉到好闊咁討論，所以簡單講供應不足，幾個上車客，每人推高十零廿萬，500萬的樓推上600萬，其實幾個成交就夠。市場上面平均可能幾百個唔同區份的成交，已經可以將500萬的樓推600呢個位。到時隊長預期的情況係好多樓估價會好易就650 / 700萬咁，但係成交就會大幅再減少，因為真係買得起的人又唔會好多，但係谷買的人又會有，而賣樓的人當然無樓的你係唔會明白，乜野叫賣左買唔番，所以一样會卡住係呢個位，形成一種拉鋸，成交減少，但財富就會不斷累積，累積的購買力就會流向可購買的資產的方向。 一直以黎，香港普羅大眾黎講，入門一定買樓，之後可能都係諗多間樓，或者車位。買工廈商廈鋪位，會係進階投資者的天下，果個世界比較上係強者同機構投資者為主打，散客一般都係買到一兩個已經好叻，但一定唔係主打，往往可能因為小生意要個工場要個鋪先諗。所以，以普通人黎講，買實物資產的主要出路得兩個，一係買樓，一係車位。 然而，政府係不停出台去打擊樓市下，樓市開始已經有左抗藥性，對過往的招數大家都已經明白，最多咪就係一句唔玩囉，但係樓仍然隨需求同通漲而升，就算假跌後都係升，而隊長想指出的係當樓市升到全部都要過600萬之後，將會出現一個好奇怪又尷尬的情況，就係真係好多好多好多好多人都買唔起樓。點解？即如果你要買601萬，你要...

其實經濟係一個週期大家都知，不過往往係週期的底部，真係無乜人會有心入市，但係週期的中段尾段，就會好多人一窩峰咁入市，推高個市，因此巴菲特講的別人貪婪的時候你要小心，別人小心的時候你就貪婪，係直接指出週期上的操作方式。 由舊年10月隊長寫過一篇 收息股價值投資 叫大家入市，當時全城吹淡風，股樓一片死寂，不過就係呢個25000點的水平，隊長就將所有基木同MPF全攻型進攻，而且股票楂到呢家都叫有D斬獲，換碼樓同車位全部都跑嬴大市，雖然當中換碼其實有成本，之不過以減債計再制造更好的現金流，今次呢一輪的換碼大行動，以今日睇番真係好成功，至少全部車位都係屋苑最低的一兩個成交，而目前帳面已經有明顯的賺幅，又大幅減債。 上個星期股市突破左30000點就回落，其實每次攻呢D大位都係要D時間，不過呢個長假期的ADR亦已經成功一下破左30000點，睇黎大市上番30000呢個水平都唔會係咩大問題，而處於上升軌的大市，應該唔會咁快就大調整，估計起碼上到32000先會有比較大的調整，而時間上可能仲會拉長多三兩個月，理論上香港的樓市將會係未來呢兩三個月持續升溫。 現階段仲有好多朋友問我呢样買唔買得果样買唔買得，隊長好多時會用射龍門黎做比喻，之之隊長認為舊年底係有2仔Q仔的格局，理論上大大注都值搏，嬴面好大。但而家呢，大約可能係4仔10仔咁吧，買樓買車位買資產長線唔會有錯，但比如股票咁，係要短線回調你又吹佢唔漲，所以都仲有機會比你搏，但係個值搏率就好因人而異，隊長個人就又係成手貨啦，而家的策略就只係楂貨楂多三兩個月就減持一下，但係未來非常短線下應該會再升一輪，但呢一輪可能比如話係5-10%咁講，如果純為短炒，成本上可能都太高了只睇呢個升幅就唔值，但係如果手持有貨的，相信等多2-3個月就可以睇到呢個升幅。 好多時好多人都係手痕痕為買而買為炒而炒，不過睇番能夠長嬴的巴菲持同埋索羅斯，每年都係做20幾%回報，就成就左今日的佢地，關鍵唔係你貼中邊一隻股王，當然可能股王會令你賺得好勁，然而要長勝的話，如果你無咁大的投資團隊同資金，唯一剩下來的，就係要有冷靜的投資心態，學賭俠話頭，你想悶悶地咁嬴，定係轟轟烈烈咁輸，都係好在乎你平時係咪一聽到投資就會興奮到跳起。其實相反，投資／投機都好，簡簡單單，人地唱到淡到PK的時間，你就入貨，個個都吹到4萬點5萬點時，有得執就止賺，唔嬴到盡，咁一年...

最近如果有去開地產鋪，應該會發現一個好明顯的現象就係好旺好旺。唔係講笑，我近期試過去中原星期日係竟然有短時間係無人係鋪頭咁誇張，而個市的反彈力都幾驚人，呢家有部份成交已經貼位舊年的高位，當然唔係全面去到果個水平，但係真係三五個成交已經由年底的底位跳番上好多。 有代理朋友話嘩呢排真係旺到不得了，咁样真係好難搵食，因為可能勁多人去搶三幾個盤，而果三幾個盤好易跳好大口價成交，即你跟緊果個客，可能都係諗住仲要傾十萬廿萬的上車客仔，但係稍一不留神個業主可能已經比人食左個盤，又或者反一口價，大家都係爭果一兩個最貼價的盤，非常難搞，好容易跟跟下自己個客唔夠實力就會收工，兩下玩完。 樓市旺，車位都一样上番D，不過車位就無樓市跳得咁快，但係高成交都開始見現。政府呢家首次回應咩一地多用的政策，係長沙灣整個咩智能停車場，講真其實真係唔好玩啦，起得黎都三幾年，先提供二百幾個車位，得啖笑啦，如果要解決就提供誘因比發展商好過啦，不過無，所以車位市場其實都係缺市。 股市方面去到29000就好反覆，呢種反覆好煩人，升下跌下咁都無方向，你以為佢破頂，佢就又跌番落黎，你以為佢要插了，佢又升番上去，呢種悶市就係隊長多年唔踏足股市的原因，最怕呢種唔上唔落但要你慢輸的市況。 呢排寫少左文章，主要原因其實個市都無乜好講，勢頭其實係早已形成，由舊底十二月隊長已經講要買，呢家呢，已經又去番一個買唔落的位，不過換左碼去車位度，就有得冧比多三幾個月個市升下煲下就出番一件補充下資金。理論上如果個市唔再亂插，相信資產勢頭仍然會上升至起碼六七月，到時食一件糊都未遲。 唯一的係呢家其實討論區有時見D年輕人點點點，其實都可以話無得諗，最後的上車機會係舊年底出現過，呢家買又要貴一球起，再有無下一個比年輕人上車的時機，老實真係唔敢講了，但如果呢一刻叫隊長諗買層樓比120萬首期供480萬30年，真係攞命都似。

樓市回暖，雖然未講話熾熱，但已經有不少高位成交，而且入市進取。係呢個時候，隊長繼續回顧自己的資產配置，其實咁多間屋之中有一間一直租金回報唔太理想，最近有一個連租約的買家Offer，出價其實好唔錯，算係近期的極高位，不過隊長要罰息，減佣減罰息下，算叫做OK，但諗諗下由於入左咁多車位，最後決定賣！ 賣的原因很簡單，套現。套現黎做乜？本來唔知的，但其實隊長係睇樓升的，而且賣埋呢間，其他的都算係核心資產唔會賣，所以賣的時間都係好掙扎。然而，就算呢層樓舊年最高位都係同呢家差大約40萬，又係計番果條數，如果賣出套現買到個車位係落後40萬的，就可以大幅減債又平得番個升幅。 有讀者話，喂你賣左如果想買番又要比15%條數點計? 呢條數可以話你聽其實係唔會咁計，首先如果你諗住要買的話咁就唔應該賣，手痕嗎？而如果你又諗緊要買番層樓的話，估計你手上都未必有好多層樓，所以你會諗增加更多樓的資產。然而，隊長的資產配置係大量的樓，呢家反而見到有水位轉移資產配置至車位，又減債唔駛供樓又有租金又有值搏的升幅，點解唔做？ 如是者，賣完當日，隊長即刻又尋下寶睇下有乜好野，代理A就話呢家無晒貨啦有都唔值買唔推比我。代理B就話無，要搵下，而第二日就有一個，我睇番佢呢家叫價都仲係12月底一月頭的水位，心郁的，但個水位唔夠深。傾左一陣，開價，最後平多5%入，代理話其實佢同一個停車場之前做左一單刁已經係我呢個價的15%之上，所以某程度上等成交一出都已經當贏左一半，咁都幾好，執番十幾皮。 所以賣完樓之後，呢家長債將會大減，短債就仲有D P-LOAN要等到期清，好彩車位全部唔駛上會無野怕，仲有淨的Cash都係養住個Cashflow。預期其實呢家個市係岩岩起火，估計到七八月又會升番一浸，如果到時可以去番舊年高位，咁就出番一個車位又套下現先。 可能你會問，喂隊長你係咪唱好車位啊係度以後唔買樓啦？錯了，隊長一样睇好樓的前景，但呢一刻的情況係，似係樓市彈得快個車位小小，所以制造左一個短線的樓市先升而車位後跟的情況，可以做到較高的賣樓較低的入車位。有朋友亦問我，無咁多資金可以做乜，我而家都係推介買車位，唔係話車位有乜好，但個市升，就當車位跟住升都已經夠，唔駛特別標青。不過，我又介紹左朋友去搵我代理搵盤，點知係我買完果個車位之後，代理覆我朋友，唔好意思，呢家真係無荀盤推介住，最後的荀盤比隊長買了。...

股市連場上升至約29000水平，樓市亦像預期所講築底反彈，如果閣下有聽隊長講係12月左右入市，呢家一定有水位賺到。 好啦，之前隊長做左連串動作今日亦已經完成所有交易，所以不防又分享一下做左D乜。其實係舊年底，隊長就放左一間價錢樓用黎套現，一來其實佢又唔係話跌左好多對比大市，二來係下跌市的情況下的確心理有D壓力，有得走當然要控制風險。 不過，賣，並唔一定係等於睇淡。由於一賣的時候其實套現番三四百萬出黎，咁但係間屋的差價就上下可能接近60-80萬左右啦，係咁的情況下隊長就諗呢舊錢用黎做乜好。如果只係套息的話，放mortgage link就有番穏定回報，但唔夠進取。如果買多個細單位番黎，真係無人頭點計條數都唔岩，無厘由未見官先打15%大板，條數點計都唔通。到最後就只係谷諗工商鋪或車位。 當時的睇法係，工商鋪黎講，銀碼始終大粒D，隨時買完又上返會，無意思。咁最簡單，搵車位。車位的好處係，當時個市真係無買家，去到邊都任揀，不過當然你想最平果個人，就未必係，之不過計條數，有好多車位都由高位跌左50-80萬咁劑，咁諗番條數，我層樓都係60-80萬的差額，呢家套現舊錢，買一個已經可以搏追番個差額，買兩個就隨時可以賺番轉頭，買三個就清袋不過就更加進取，但就算買晒三個車位，對比之前我楂住層樓仲有條mortgage係度，而家買晒三個就算無現金，一來係呢單換碼事件上係無左條債，二來可以搏再番轉頭再賺，又可以有三注可薄Cut可厚切睇市況，現金流亦肯定係正數，除苯點都有精，所以係十二月底就即刻掃入左三個車位。 呢家睇番，全部都唔係最底位，不過都係最低果一堆成交。而今日的價，全部起碼已經執番20萬一個車位，即係帳面無左條mortgage但執番60萬，已經追回樓價的跌覆，但反而如果楂住層樓，可能都只係彈番20-30萬左右。所以，而家個狀態係輕鬆左亦彈性左。 當然你又會話隊長你唔係之前唔睇好車位咩? Well的確有段時間係樓比車位好，但今次換碼當中，亦睇到其實車位係跌市時又真係無乜人接，係有呢D問題，但樓都其實一样有呢D問題，係無Buyer時都係無Buyer。不過，車位唔敢講係專家，但車位曾經上過的位係有數字支持的，而家睇住個高位，同自己的入貨價，對比之前係未創過高位要去搏，呢家係有得計數，有得計數就成件事好唔同，因為可以估到自己可賺幾多，以及蝕幾多。個人認為，唔好講...

估唔到呢一個成人節系列咁多人有共嗚，所以隊長又繼續手痕寫多篇，因為上篇係講，究竟係香港而家想做中產有層樓仔的疑似幸福的人的條件，不過生存的人很多，但生活的人，其實要求卻是更高。 當你細心觀察一下，有好多車在大街上走著，好多小朋友由工人帶著人來人往，小小年紀說出流利英文，進進出出的是私校的鬼婆幼兒園，然後鏡頭又一跳，一些衣香濱影的人在五星級酒店喝著英式紅茶，然後走到酒店的代客泊車處，隨便給了100元小費，一家人就輕輕鬆鬆上車回自己的所謂中產的家，這些人，又到底是什麼模樣的人，要搵幾錢先可以生活係另一個層次的境界？ 是這样的，如之前分享過一篇文章，超級有錢人，是擁有著金字塔，所以如果你係有錢佬的話，生活是美好的。然而，有錢佬係香港點都係少數，然後剩下來的，只係金字塔內的人，有些是塔尖的，有些卻只是中間，但積極往上爬。在街上，無人翻開底牌，你我也不知道究竟誰比誰更靠近塔尖，不過就隊長所觀察，當好大部份人過了可能金字塔的一半，就會好有衝動想做金字塔頂的人，然而現實係你搵幾多賺幾多並不是因為你去充而能改變的，特別在香港這個M型社會下，越去充，越易令自己加大負擔，但野心同生活品質以設至很高，收入就算增加卻都不能追上慾望，有些感情就會在40-50歲的時間更被磨至体無完膚。 先回帶至上一篇，其實一對普通的情侶，如果係諗住自己可以做更優秀的人的話，係香港，至少你首先搞得掂果200萬的結婚同首期，清袋後還能應付所謂的成人自住責任開支，以沒有太多家底的人黎講，估計起碼兩公婆十萬只是入門。有好多人認為，兩公婆加埋十萬其實唔錯啦，如果你認為係咁的話，隊長只能話小朋友你的層次實在還是太年輕。不是說隊長搵多少的問題，只係當你經歷過，你就會發現你又想有將來，又想住大D，又想有工人有車，然後又懶係中產咁，十萬，美其名只係可以充中產，但並不足以令你完全成為一個中產。當然時間累積一定的財富可以改變，但呢個又係一個時機問題，即係比如隊長一直說十一月入市係良機，如果你買左層樓，可能已經無啦啦執50至100萬，如果用時間量化，可能就等於三兩年時間的錢，但這只適用於你係有投資眼光同獨立思考的人，而如果你無呢一種能力，十一月的你同而家的你，最多都係儲多十萬八萬，甚至無，想突破又如何難？ 做一個比一般人不平凡的中產，本來駛費就會高，因為係眾多選擇中係唔駛太去選擇，即係乜都OK LA，負擔到...

今日二月十四，首先祝大家情人節快樂。 古語有云，有情人終成眷屬，兩個心愛的人係埋一齊當然係美好不過的一件美事，不過生活係香港，撇除一刻的溫馨之後，隊長今日想探討的議題係，係香港的情人，特別係年青情人，其實面對緊一個乜野的社會狀況呢？ 呢個討論如果從經濟黎睇，係一個好尖銳而又好敏感的議題，因為有正義L都可以衝出黎話，乜野都係計錢計錢計錢，真愛並唔係咁架! 認真，我真係好認同真愛唔係咁，而且任何事都有例外，之不過隊長整體而言係認同貧賤夫妻百事哀，同埋唔太相信有情飲水飽呢兩回事。 首先講一些身邊的例子，有波友本身做快餐店經理，搵萬六，33歲。女友做文員，搵萬零蚊。當然，今時今日今刻今年今月今日，都可以好開心快樂咁生活。又講另一個朋友，男的做IT Support搵18000，女的教書搵35000左右，35歲左右好開心咁生活，不過家住太子唐5樓月租10000。又有朋友男的搵60000，一個養全家四口，住村屋，無車。又有個朋友，女的做文員，15000，男的做冷氣維修，搵20000，有兩個仔女，住公屋，不過爛賭，男的借貴利欠下百萬連利是錢都偷埋去用，都唔知點翻身。又有個朋友，女人40，兩個女，一個人做會計文員搵20000，住劏房養兩個，舊老公就係因為錢而離異。老一輩的人更多故事，有的老公靠老綜過活仲大大聲扮識野，開歺飯兩公婆都噪交，又係錢。有的爛賭直情消失左，連頭家都唔要，兄弟姐妹都搵唔到佢，要個老婆由主婦出黎洗碗養大兩件。香港地乜故事都有，你可以話佢地開心，或曾經開心，但係好多人其實係結婚一刻都未知其實乜野叫做責任，亦根本無計劃過自己的人生，有些人結婚後先開始明白，有些人連結婚擺酒都已經要分手，先莫論愛有幾深，但當你要面對現實係咁要你攞幾十萬結婚，甚至話攞幾萬做禮，再甚至只係十萬八萬買隻戒子仔，呢度十萬果度十萬，好多人都會清袋甚至諗唔掂，之後就會要選擇，要選擇就要放棄一D野，之後就會容易有矛盾，所有野不得不回到最原始的問題 - 錢。 當然每個人的人生都唔同，要求乜做Ｄ乜，搵幾多同洗幾多都係整定，之但係有一样野係隊長成長過程中係一步一步咁明白，如果你唔係好早就有計劃同獨立， 你係永永遠遠唔會明自己原來一直無長大過，年過三十並唔代表你係成人，特別係香港呢個晚婚社會，隊長認為35都未必可稱為成人。 就以好多情侶為例，同屋企人住，大學工作出黎做野開始比下...

今日年三十，狗的尾巴馬上結束，首先預祝大家係豬年賺到豬籠入水，股樓暢旺，最緊要係身體健康。 回望狗年，唔知大家過得好嗎？對於隊長黎講，有點兒像是玩過山車一样，但起起跌跌實在唔係普通人能承受，隊長真係有時身心都唔係咁頂得緊，如果有人同你講話唔緊要啦，明天會更好呢D懶正面的野，有時發現都係無乜用，當你浸係當局，你就會知四面都是困局，走不出黎但又死唔去咁。不過諗深一層，其實個天都幾有趣，總是好似同你開玩笑咁，攞走你一D野，又會派番D野比你;但派D野比你咩，你又會輸番D出去，我記得唔知邊套戲講過，呢舊錢你攞左，袋得到天光先算，呢家隊長都深有体會。 不過正面D去諗，從財務安排上，是非常唔錯的。要賣的賣左，要換的換緊，過埋成交就可以再分享，如果無人撻頂的話，應該都叫做全線撈底成功，呢一下個timing唔錯。不過，比如工作的話，要殺埋黎的就殺埋黎，其他野都係咁，呢個世界好多野錢控制唔到，所以當財務又達到某一境界時，你會發現人生原來仲有好多野要珍惜，身體健康也許可能係第一位，如果唔係有錢無命享真係大X穫，學我的一位朋友話頭，賺遺產係一件極ON9的事，所以大家記住要好好保養自己，不過講到咁大家唔好亂諗野亂估野，總之珍惜自己，珍惜身邊的人和事。 今年隊長設定左一系列的目標比自己，其中一個今年重點的項目RK1昨晚剛剛開始了，這個項目的timing其實一直都好差，亦因為隊長之前的資金被綁死而一直無法有效得以開始，然而今年終於有鬆動的資金可以著手，希望7月可以完成。另一個目標係個別的非核心投資都希望今年在有正回報下套利套現，以補充現金流去支持第二階段的RK2項目。不過其實RK2應該一早進行，但係timing又係錯左，如果唔係就會完美達陣成功。 核心的項目仲包括年中Secret project的harvest，呢一Part如果順利就會可以定位更多的細節，而另一個Project就係同Partner的新合作，可能要開始有限度的重操故業，但有待跟進。後面的仲有兩單非核心的「官司」要跟進，不過好多文件要準備，但隊長我發現其實做按揭比銀行呢個經驗好有用，因為當你做過十次廿次之後，你人發現其實法律的野都係好似，D野好死，你一層一層要有文件 藤掕瓜瓜掕藤咁去做，中間一斷就係會比人追文件，所以有有果種按揭查家宅的思為，都係好適用。 樓市方面，按過往預測都算大方向準確，狗年初時叫...