[BK017] 樓市將準備回升

經歷左一大輪的淡消息後，十一月隊長其實視為谷底，於十一月底居屋的購買力釋放，整個十一月股市都由低位反彈左2000點左右，再加上貿易戰休戰90日，未來似乎係一個可以比市場喘息一下的時間，而下一個關鍵位將會係十二月中，聯儲局係咪會一如預期咁加息，定係又因為如之前有官員放鴿話可能已達至中性水平而唔加息，都會再比大市一個推動力，不過當然係推上定推落就見仁見智。



之但係隊長認為十二月加息本來係市場確認左好耐，如果突然間話唔加，背後的意義可能就會同侵侵成功用口技壓制聯儲有效，而如果朝呢個方向的話，意味著明年的加息速度都會大幅減慢，呢個就會係一個非常正面的市場訊號。所以就隊長個人睇法，加的話市場本身都會接納，唔加就可能會開P慶祝，所以都應該會係一個比較容易托一托市，順便係年底粉飾一下廚窗數字的機會。


股市方面，其實係10月31日隊長都出左一篇文叫大家可以入下D收息股，如果當時有入的話，呢家都應該有8-10%的回報，雖然未到年底唔敢講仲會唔會炒大穫，始終美股都試過無啦啦痾拔甩跌800累香港慘跌，然而如果你認為個市唔係咁差的話，隊長出文果一兩日其實都係本年最低最低位，真係唔係話講笑，我亦有係果段時間叫身邊朋友入市，唔買樓都應該買下股，如果有跟買下正股的話，應該都有所斬獲。


通常D人都話股市行先樓市半年左右，呢個立論雖然隊長唔係太同意，畢竟時間差同埋幅度都唔一定一致而且亦有多次背馳，之但係用呢一個坊間都好多人講的立論黎講的話，股市都已經回升，其實樓市亦都會回升。係過去一週，汪總都指出無論成交量同埋成交價都係回升的，實際上其實呢三個月至半年的成交量係好低，表示的係執到荀野的人其實係少數，而且大家不防比小小心機去做下功課，睇下各區大屋苑的成交，你會發現同報紙講的野數據上係有極大出入。


就以隊長跟蹤的幾個細價屋苑計，減價盤有無呢?有的。荀盤有無呢？有的。但係極荀的量多唔多呢？唔多。可以簡單咁講，最近幾個月的價錢平均一定平左是對的，但大家都明白有唔同座向唔同質素的數，就算創新高時都會有低3-5%的成交，而普遍係呢段時間成交的，亦大約係低3-10%不等吧，就呢一個層面黎講，可以係話議價空間大左，但係咪話樓市大冧市呢？咁就太天真。


另一方面，有無平高位10-20%的盤成交過呢? 答案都係有的，不過要搵就要細心D去搵佢出黎，即唔係話個個成交都係跌得咁金，但的確有人係比起最高位平左20%都有的，而如果真係回頭升的話，咁大家就要恭喜呢D叻仔，因為係呢堆成交入面真係只有少數人做到。


好啦，仲有幾個盲點係出現左的就係，一方面好多人會用最高位的成交作比較，其實呢個係一個好怪的立論。當然，好友衝上去果時緊係話嘩又衝新高，咁跌落黎就用高位做比較好似好岩，然而如果用番一個較平均的市價，即比如果某一整個月的平均成交價黎講，以剔除某一兩條茂利有錢就任性咁搶高左一個比market price更高的價，咁其實你會發現可能要搵由中性價位跌20%的盤係更加難。


最後一样野係，其實報紙日日吹跌同冧的時間，有無大量負資產同銀主盤造出黎呢？基本上係無。有無大量人破產供唔起燒炭呢？都無。股市係呢一年係好多人輸到HiHi，但係睇番樓市如果你同2018年1月的樓價比，就算話回軟的價，其實全部都高於年初的價格，所以與其話係樓市跌，倒不如話係年中升過籠要調整一下吧。


點都好，如果股市都見底，居屋購買力回流，貿易戰又有90日蜜月期，下一步就只睇埋加息步伐，有醒目的回流客都已經開始入市，樓市小陽春雖然一般都係新年後出現，不過如果購買力一拥而來的話，可能十二月或者一月，會有一個比較明顯的樓市反彈都說不定。