單幢十派時

一直以來隊長叫人買樓都係唔好買單幢屌腳，原因重覆過三千幾次，一來成交少，二來管理差，三來升跌都好鬼慢慢半怕，四來管理費貴，總之正正常常一個屋苑人多戶數多可以避的野，又成日又四大行的地代帶人睇樓的實無死，呢個係隊長犯過錯後的一個結論。


然而，話說隊長最后一間買入的樓，係走甩左一間荀到仆街的盤的機緣下，就去左周圍睇。無他的，一方面果間荀盤真係荀到發癲搞到自己心情唔靚走左大寶。二來，隊長同自己講將咁多蛋放係同一屋苑亦唔係方法，因此係傷心受創的敗走之旅入面，我去左買左間深水佬的單幢特色戶。


買呢間深水佬的原因係個死人平台好鬼吸引我，開揚又寧靜係一個不爭的事實，而且距離地鉄又唔遠，但深水佬一個大問題係好多細A而無大A，而且又係一間單幢樓，唯一無violate自己個原則的就係要夠平同埋有selling point - 近地跌。所以係一試無坊的情況下，求其出左口價，傾下傾下其實同平時熟路都好唔同。熟的屋苑知價，比多一蚊我都知抵唔抵，但呢件單幢的，有小小溫溫鄧鄧就跟住買左。


係買入後的呢一年，成交係零。本來一直都有D後悔，因為睇番我走寶果件荀盤應該呢家執120萬左右，但果時屎忽痕有錢就想買的情況下，所以就買左呢件野，仲要如果大家記得買完無耐就出招，比經X同獅子玩左一輪的情況下 (PS. 記仇的我講多次，大家唔好用經X，點解？最後連coupon都係要追，你唔追佢死人都唔寄比你)，之後買入仲發現樓上爆水喉，然後係公家喉法團又十年都唔係一次會，管理公司又得個阿叔係度唔理野，真係可謂對牛彈琴，就算隊長有埋法團經驗，又食環投訴搞呢搞路，都搞左我半年先搞到果個業戶肯維修。


所以一直可以話比大家聽，單幢樓都係廢架啦，但係我仲有D原因要買呢間就遲D再分享，然而當所有野一路都係差，又無成交的時間下，連網上都無得定時定侯估價的同時，隊長近日又去搵阿細A吹下水，佢又屎忽痕幫我報左個價番來。噫，睇一睇，都執左100萬喎，呢一刻的心情真係用十派時黎形容。本身我買的時候係稍稍估唔足，而家呢個估價同一間bank黎講應算保守，100萬亦唔算過份。雖然計番呢一年半年其實買乜都會升10-20%，但係一直無成交的呢個單幢真係吹漲，搞到我心情低落以為老貓燒J，好彩都保得住個清白之身。


Anyway，呢個單位的故事未完，要繼續玩下去可能又是一年的事，希望有日可再分享。無的話，就係簡簡單單收個租亦無乜持別，點都好，希望大家都繼續賺錢。