隊長增值服務

財務自由僱問服務 [讀者來信]一個簡單的過程,令你明白下一步該做什麼的機會,向財務自由向前踏出成功正確一步。
隊長裝修僱問服務 [裝修服務]第一次買樓裝修怕比人呃?試下我地呢個服務啦。

Saturday, January 6, 2018

超級通脹已在成型


由隊長開始寫Blog已經講過,資產升值的一個主因就係QE,唔單止係美國,而且仲要係全世界一齊不負責任咁QE。而係過去的幾年,QE的作用係去填番美國金融海嘯再加埋各國長年累月的福利開支等等的黑洞,所以金融海嘯沒有造成大的爆破,尤其是係香港大家更繼續好似無事發生咁生活,不過由於呢個係一個無恊調的印錢行動,大家總之見到你印佢就又印,以平衡人地國家印錢後所影響的匯率,故此呢,當QE的效力由救市行到經濟好轉的一個臨界點時,就會變成超多的遊資瘋狂炒作,而超級通脹就會開始成型。


唔難預期,試諗下你好唔掂時,你有錢只會係維持生活開支。但如果你好撚掂時,但D錢仲係咁流入你個袋,你發現真係累積太快洗唔晒,就會去搵D野買下投資下。而如果人人都係咁的時候,不難預期大眾化的投資產品如股樓都會瘋狂咁升。睇番今日,樓市真係好似食左忽得咁狂上,由隊長我十月份講話樓市已經有足夠條件再上到而家,兩個月起碼升左5%。而股市就仲癲,美股破25000,港股破30000,而且強到你真係以為佢唔識跌咁,人人都話買騰訊,而係呢個咁瘋炒的大時代,港股仲未破上次高位32000點,睇黎今次都會破之餘,上探高位又唔知係邊,比個股市制造出黎的財富係過去呢段時間及至未來要探下一個高位時,又唔知會制造幾多新的百萬千萬富翁出黎,呢個向上行的漩渦,將會引發通脹是必然的,差在係唔係去到超級就要再睇。


咁乜野叫做超級通脹呢?其實真係無一個實際的定義,津巴布韋試過上午買個包下午就要升幾倍價錢的,肯定算係超級通脹,但如果以環球相對大型的經濟體黎講,美國係上世紀70-80年代就試過一年的通脹去到10-15%不等。所以如果先落一個比較易睇到的超級通脹,可能就以雙位數的通脹去起步吧,而如果突破到15%一年,已經算係除左打仗之外地球都十分罕見的情況,那麼應該也肯定算是超級通脹了。


睇番今日,破頂的東西天天在發生,港股在破頂,美股在破頂,港二手樓就繼續升,新樓呢之前長實賣維港頌4萬幾蚊呎以為已經好癲的時間,新地北角海漩就一下子去到6萬一呎,再咁搞法臨海會唔會直迫山頂價真係唔知,但破頂的情況似乎陸續有來,而地價就亦係同样情況,海航狂投啓德地破頂再破頂咁都繼續買,你以為佢痴線咩,鴨脷洲地王長沙灣地王一样狂升,地價同样係不停震驚市場,所有所有野都證明係游資好多,有錢人的錢越來越唔值錢,所以就會四出找尋投資機會,物價上升亦可期待。


所以作為打工仔的話,當超級通脹真係來臨時,其實係非常唔著數甚至好無意思。試諗下今時今日你如果乜都無投資,但你的同事朋友甚至下屬,就因為佢地有層樓有股票,係咁易就呢兩三年話執左三五七百萬,而你打份牛工就算人工比佢地多,但都追唔到因為佢地投資所得番黎的財富,其實係一件令人氣餒的事。可能你話其實日日都有人富貴唔恨得咁多啦,但係問題係以前可能講緊富貴的人可能係5-10%,但最近三兩年,富貴左的人可能去到30-40%,咁就係一個問題,因為呢個世界所有野都係相對的。當人地相對有錢左,其實即係你相對窮左,呢個係一個現實。


點都好,如果你認清呢個係一個勢,而且仲只係一個勢頭的開端,咁你就要好好諗下究竟點样先令你自己唔會相對貧窮左,畢竟今日就算有一兩層樓,隊長認為都只係可以做到唔比個大市拋甩,而如果你連樓都無仲要租樓的話,試下諗超級通脹來臨時,你會唔會比瘋狂的物價活生生夾死。


隊長的睇法係超級通脹的風暴已經明顯在成型,當天文台係一號風球時話比你聽有機會打十號風球了,之後係點防風就係你自己決定了。






13 comments:

  1. 通脹已來臨有可能發生的 !

    ReplyDelete
  2. 資產泡沬化是存在,但人們的危機意識仍對未來充滿期待,如物聯網引伸的新經濟,機械人科技在發展,手機支付在減低交易成本,上述三因素都郁不少國家在推動,所謂超級通脹叭是食衣住行囧大要素中,住部分是有泡沬,情況並不太嚴重。

    ReplyDelete
  3. 放心,聯儲局的官員已知道這情況,今年一定不只加三次息,我預期會重演94年加七次息的情況,樓價不可以再這樣下去的。

    ReplyDelete
  4. 不少人在投資路上年年交學費,又睇淡樓價多年,相對這個世界已輸到爆哂廠。

    資金長期泛濫下卻睇淡資產價格,年年找理由justify自己的期望,年年都話樓市即將爆煲,被懲罰的只有自己。

    ReplyDelete
  5. 放水易收水難,美國最多加2至3次息

    ReplyDelete
  6. 我都搞唔清楚點解加息但係樓係會跌, 一早PLOT左條CURVE 都知係關M3 而唔關利息事
    基本供求問題都搞唔清楚, 但係好多呢D蛋散就上電視扮專家, 可憐偏聽的人無視事實不特止, 仲要身體力行沽埋自住樓/租樓等跌
    一年3% 租金係咩意思? 就係30年後層樓係你送俾業主, 又或者, 每年你要個市跌3% 先平到你條數
    呢家係講緊幾百萬的3%, WHICH IS 等於好多人的20%年薪或更多,咁樣都仲要賭, 我就真係唔知講咩好

    ReplyDelete
    Replies
    1. 一年3%租金唔係30年後送樓俾業主,會加租所以係20年未夠就送咗,另外跟M3每10年升一倍。

      Delete
  7. 2019年4月睇番師兄呢個文章, 只能說看法中肯, 準確.
    另外小弟都同意未來車位會升, 因為資金太多, 樓double stamp, 資金會流去細價資產.

    ReplyDelete