報章編採的水平


其實好多時睇報紙或網媒,成日都有好多關於財經的專題報導,又或者唔同達人的專訪,好多時其實隊長睇完都覺得得啖笑,尤其是當做人物專訪時,達人又好普通人又好,隊長認為有好多記者其實真係好幼嫰,一來成日都文不附題,二來受訪者的水平以及訪問者的水平一样低,唔到point時又吹到大一大,好似做訪問的就係中學生交功課咁求其訪問過就算,不管質量,而受訪者其實級數唔夠時又疑似被報章加冕成達人專家,講真識野的睇完真係無所謂,笑一笑就算,最怕真係唔識的睇完當左秘笈,咁就真係累人累事了。


可能你會話,車,隊長你係咪無人訪問你所以係度眼紅人地啊?講真其實隊長呢幾年推過的報章訪問起碼有5次,主要原因係本身隊長又唔駛sell班sell野,真心唔駛出名做宣傳,做個訪問無乜意思,而另一方面呢本身隊長認為我自己都真係唔算有料,所以自我審查都認為何必獻醜呢。但吹你唔L漲的係太多太多的專訪所謂的達人真心只係一個普通到唔普通的人,難聽D講句差唔多買到一層樓上到車,都會間唔中有人訪問下做專題,然後總是補充兩句話心得就真買層樓之餘又買下心水愛股如科技內銀股等等,老實講如果個訪問係以上車為題咁我OK,但真心真心唔明點解成日都會被吹棒到成仙成佛咁,喂係咁勁的就唔駛撈啦仲係度學隊長一样捱騾仔咩。所以隊長的鄙視係黎自於其實採訪果個又唔識野,受訪果個又唔識野,兩個傻豬走埋一齊又變左神人,真係好鬼搞笑。


隊長認為,受訪者唔識野係可以明白,但採訪的能力同判斷真心差先係得人驚。簡單講,做財經版日日都係對住D財金鉅子啦,我明白有時有D財演就算無料扮四條如大師都會有棒場客,咁棒左個有noise的財演去訪問谷收視係一門生意同學問。但係如果你訪問一些名不經典的人然而又要神化為達人,而原因只係採訪果位師兄師姐真係唔識而且層次太低,以為只要有層樓或炒隻騰訊就係神,咁不如你落街求其搵條友訪問下問佢港股大時代執幾錢算啦,但真係唔好神化你的受訪者,因為呢件事我真心覺得只反映採訪人的層次可能同一個中學生大學生一样無分別,求其有條MK仔走埋黎同你講佢炒股執十皮八皮已經係嬴左個香港,實在我可以話你聽係隊長身邊的唔係所謂專家,不過人地有小小錢,楂住一千幾百萬,係股市最近半年執幾百萬唔係咩神奇事,不過你可能買幾十萬股時,佢地買幾百萬之嘛,無乜野值得分享,因為人地舊本大過你之嘛,俗D講句,係你未見過大蛇痾尿姐。


然而記者又唔一定係講財經的,也有好多副刋專題的做貧富主題的又好中意去訪問基層時,同样想去訪問下一D相對上左岸的人去睇下有無離地,或幾離地。當然隊長其實幾欣賞一D有心有熱血的記者去關注貧窮問題,令社會的一些困難面在報章上反映出黎,甚至改變社會,呢一點出心係好的。但同時唔知會唔會潛意識亦可能陪養左多少的仇富心態,一些問題的本質就係要睇下你有幾離地,例如問你係咪教人發達?講真,對於財務自由的路上,其實好多人都知係唔會發達,而財務自由只係可以令人生活得相對富足同輕鬆一點,而理論上唔計真係基層得來有無限痛苦故事的人外,其餘的人有份工正正常常,咁就算唔係天材,但只要明白乜野係財務自由同點样行,定好目標後大有大成小有小成,真心真係人人都可以有一定的成功,不過採訪的人似乎真係唔識,所以只會認為何不食肉糜,又或財務自由同傳銷或種金一样走上邪魔外道之路,所以講黎都嘥氣。


又講回財務自由呢件事,其實我認為如果財經版的人都未接觸過就出黎學人訪問,真心係少左一門心法去判斷。我相信大部份有番咁上下實力的財務自由人都會明,當你睇到一篇文章只係講個主角買左層樓好,或者買左乜乜股賺左幾多錢咁,其實真心無乜意思,簡單D講咁又點? 最大穫係,採訪果個唔識,編輯果個又唔明,為交稿而交稿,佢地唔識唔明,所以大眾就更加唔明,難怪呢個香港咁多人都無法向上流。


講真如果有報章整個財務自由版,我相信大量的Blogger的分享,內容一定比起所謂的訪問乜乜達人有更高層次的內容,亦可以提供更廣的投資者教育比大眾,不過做唔做到其實真係又無乜所謂,學窮爸富爸咁諗,財商都係主要靠家庭,無得講。





留言

  1. 隊長兄, 看了什麼編採大發雷霆?

    回覆刪除
    回覆
    1. 哈其實好多時有呢種感覺, 不過最近先打番出黎呃下文 :)

      刪除
  2. 有怎樣的讀者,就有怎樣的報章。

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力