香港的90后是最悲哀的年代

一睇題目，你可能即刻諗，喂隊長你做乜咁灰燼啊？或者咁講，事情係有兩邊睇的，其實香港的80后同00后又唔係咁慘的，只是隊長側認為90后係一個最悲慘的十年年代而已。


首先，呢個世界從來都係長江後浪退前浪，70后推60后，80后推70后，呢個係一個正常的社會現象，90后能唔能夠推80后呢?也許係得，隊長睇的係，係90后未推倒80后之前，可能就會比00后同10后推倒。換句話說，80后尚有機會上一陣位，但90后可能連上位的機會都無，就面對新的社會新的經濟巨浪威脅。


係過往的經濟，其實某程度上大家都係鬥緊差唔多的野，即30年前的銀行，同10年前的銀行,都係做緊同样的野，就算換了包裝，裡面的內容都大同小異。因此，新人入一間公司，公司與公司之間的競爭，都係可預視的，所以大家裝備自己的學業技能同路程，全部都係一個倒模做出黎，大家跟住行跟住學跟住做就差唔多，呢一條formula一直應用自我果代都有用，相信細我幾年的到目前的社會狀態都慢慢上軌道了，而上軌道亦即係搵到小小錢，咁岩80后出黎仲有過樓市的低谷期(2004-2007)以及(2009-2016)，呢段時間你有收入有能力，要累積資產食埋呢個經濟型下的老本係絕對可行的。


然而，目前的90后，接近90年代果批出黎幾年，上車已經接近無望，未出來工作果批呢，就更加係學左一大堆前上定下來的技能同能力準備加入社會作戰，但未來隊長認為佢地面對的困境會比想像中更大，因為一方面已經係樓市飛昇買唔到樓，二來係工作方面更加係進入左一個超級科技時代去屠宰老企業的年代，未來將會有好多巨人會突然無厘頭倒下，主因係一些新的APP一些新的服務產品出現，而呢D產品同服務將可以有效地係三個月半年下突然將一些老企業推倒隊冧，不過係香港呢個APP沙漠下(唔係無，不過唔夠人多同快），入浸經濟的好大機會係國內的企業或外資，當然你可能話一雞死一雞嗚，佢地始終要請人做野，是的，但問題係請唔請你以及你係咪能夠係新的科技企業下生存又係另一回事。


老實講隊長不止一次強調，呢家國內的IT / APP發展係快L到飛天同快L到你唔信，而且佢地盈利模式好高，只要一爆紅，全國的人都唔知點解會好樂意去用，不論年紀。呢样野全世界都做唔到，即舉例你叫你阿媽download個APP叫佢用佢都話唔識時，國內的農村大媽反而會用到得心應手而且又有支付寶肯比錢消費，吹咩？而如果你呢一刻仲係度偏安咁係香港以為個世界唔會變，阿媽買餸煮飯仍然係每日落街買餸煮飯時，呢家的國內大媽已經係玩到用APP買餸落單買菜買肉買紅蘿蔔，並且保證30分鐘內到達，背后的成個logisitc更加驚人，由落單到每個城市的中央倉庫的車手，即刻攞貨包裝埋再出車以及GPS全程跟蹤，買幾十蚊餸都玩到成個大生意，連街市都可能要轉型，未來個世界，將會係你都唔知點死的時間下突然就被取代了，這就是香港90后將面對的問題。


隊長認為未來十年將會係一個準備大洗牌的IT時代，新的服務同經營模式將會突然出現然後突然殺你一個措手不及，前人已經上岸的可能還好，但90后可能才進入一間公司幾年，然后突然就唔知點解無得撈，然後又發現自己可能根本無法fit in 係新的IT公司的business model入面，然後就完了。你可能會諗點解會fit in唔到啊? 是的，因為文化問題教育問題技能問題速度問題身段問題，呢堆野國內的90後係比香港的90后更加優勝，以前香港的優勢係三文兩語同轉數快，而家有左IT的話，網頁你中意中文就中文英文就英文，連講都唔駛，轉數就一來國內精英追近香港，二來個轉數唔係要走精面，係要創意套落國內成個巨型的IT生態，你香港連支付寶掛銀行以及淘寶都係掹車邊痴住國內個平台，要用中國的平台中國的方法去鬥，呢方面的競爭能力香港真係會輸。


所以90后將會係洗牌過程中洗黎洗去，而十年左右可能新的經營模式就會比較穏定下來，而且香港也許可能會被深化係大陸的市場入面，到時的年輕人，即00/10後可能就會更容易接受同思考到究竟將來係點样在市場競爭，而90後可能只係仲食70/80后的尾水係老模式下生存，兩個年代的人將會有好大分別的機遇，而係新的IT時代，收入的巨大係真係好誇張地唔同。一隻手遊可以係幾百億的生意，係香港根本無可能，而創辦人的年輕人好容易就突然拥有巨富，呢個係國內新的時代下將會領先全球的新經濟局面，而樓價更加可能會轉移至以IT行業的新貴去定價，所以90后更加容易被夾死。


再具体一點講，呢家我覺得就好似大家係福田排隊等過關去深圳，得一條隊，60後第一班車到達，果時未有「自續」過關，排純人手長長龍，未清完一班車呢，70後到了又排長左，然後到80後又到了，跟住就到90後到，幾班車的人塞晒係條隊度，當然順住行，除非你屎忽痕去左廁所或換錢搞呢搞路，否則90後應該都係最後排，但正當00後都到達時，關口一聲令下開放自續通道，00後岩岩到見到長龍早就唔想排，點知關員突然開條新隊，成班人狗衝過去自續果邊，而人工果堆又點呢？60後70後都差唔多過晒了，80後都過左一部份，好啦有D見自己差唔多都過到又唔想轉線，90後係後面，有部份見到好似都就黎過到又唔想郁，但有部份90後見勢色唔對，即時轉過去自續線，但過去果時又排左係00後之後，其實又係要等差唔多人流，番番去人手咩又要等，最慘的係呢家你張回鄉咭都唔知登記左未，原來00後本身張回鄉咭係登記左自續，但有部份90後係原來未登記，行到埋部機先知唔得，到你都要打番轉頭登記左先再黎，但搞得黎咩，可能10後都到達了。咁睇番人手果邊條隊，有好多隊尾的90後可能仲排緊，有時見前面都清左一班人了好似有機過關了，但你其實又點知，係關員的另一邊，已經準備嗌話人手服務將會停，唔理你排幾耐，你都係轉去自續果邊吧。由於cut隊的時間就係90後附近，90後可能搞黎搞去都未過到關，00/10後就覺得不受影響，好似仲過關快左有Ｄ追到80後的時間仲未定。


點都好，樓始終係人類的必需品，未來係IT年代的突破下，經濟將會又有一個新的動力，經濟好左，樓價只能局升，而且大陸的樓，將會好大機會超越全世界的樓價。而香港，都應該唔會太差，問題只係90后面對前後夾擊，將會係一個好難捱的一代。