細價樓的合理不合理

成個新年細價樓呢個話題仍然係最熱門的樓市問題，網上的交戰繼續發炮，雙方都拋出數據同理據去支持自已的立論，因此據說新年的銷情都有所放慢，好多人亦懷疑細價樓持續暢旺的可能性。


如隊長之前所講，我由去年尾開始已經唔會主動叫人去買細價樓，因為風險同回報開始唔合理，及至年初之時我都開始認為細價樓或者見頂，但后來歐洲又黎整個龐大的QE，美國的減息行動又睇黎只係出口術行動，加上20121026的原因，隊長認為細價樓的升勢或者可以持續，不過當然可能就會有減速的勢頭，但如果要以三成五成咁爆破式下跌的話，時機睇黎未成熟。


兩三年前，隊長我曾經問100萬到底係乜野，兩三年前的100萬是很多。但今時今日的100萬係乜野，唔到你唔信，今時今日有100萬的人真係好L多，多到你唔鳩信。你可能會話再多，都唔夠窮人多啦？或者係的，不過我諗如果你做銀行的，係咁易睇下結餘有100萬的戶口，可能隨時有十萬個或以上，唔理呢班人上左車未，但好肯定的係市場的購買力係好強勁，亦即係市底好強，如果樓市有合理的水位，一定有足夠的人入市。


可能你會話，個市係好唔合理，價錢完全痴線，呢個我都認同。不過身處係一個changing enviornment入面，價格變化太大的野，好多人感官上的接受都係比較慢，因此就會覺得唔合理。可惜，事實可能反而係樓價係合理反映左QE的水份，只是反映得太快太急，去到你我都覺得難接受，不過慢慢就會由經歷憤怒，不安，繼而就會接受同適應，呢個係一個時間的過程，亦係一個投資的機遇，如果你眼光獨到，睇到人地睇唔到的水份，係人地仲係憤怒，不安之際，你先出手，先食頭啖湯，最后你就會得到回報。當然，睇錯的話亦可以受罰。


最近政府又吹風話會留意細價樓的升勢，又會留意財仔承造三四五六七八按的情況，其實如果再出辣招，之前講過話要經立法會，呢件事應該係今日黎講好難再過到。所以如果要搞，就只會再收緊按揭成數。老實講，貨源歸邊，再出招根本已經郁唔到上晒手的貨主，形響的只係果D上車的買家而已，講真未上車的真係比個政府玩死，信你的人全部呢家真係半天吊，買又唔係，唔買又唔係，仲日日租緊比人閹，政府好應該搞少Ｄ個樓市就當幫忙，但係搞下財仔呢D令個市場健康的野就要做，如果唔係就會增加部份市場的風險。


去到今時今日，價錢合唔合理真係好難講，講真你用一個人的單位去計，要買層幾百萬的樓就一定唔合理，不過問題係你自已計自已一個人的入息供款比例時，你隔黎果個買家係計緊一Pair人，而你后面果個人，係講緊佢一Pair人加埋雙方父母，你認為唔合理的時間，層樓已經比果班成家人攞錢出黎的買家買左，而下一間就又貴10%了，你唔買，但有人買的，呢個就係市場，市場有成交就係合理。


那怕我覺得都唔係咁合理的時間，不過用一個人對一家人的能力，有時合唔合理只係觀點與角度。不過一家人，人人攞幾十萬出黎，呢個就係潛在於香港的購買力。市底太強，見頂唔一定等於大跌冧市，所以我始終唔係好認同會跌。一個輕微的升幅，睇黎係羊年的樓市走勢。