跛腳政府的樓市


有網友問我點解最近兩星期無文章出,一方面大家都明白當下的政局好亂,后市可以因為唔同的事態發展而變幻莫測,而且每日的新聞疲勞轟炸,身心都好疲累,實在無太多心力可以堅持從前的文章數量,特別係樓市新聞其實亦沒有太多。


目前的政局下,其實一個好關鍵性的問題就係政府從頭到尾都無提供任何野去諗住收科,亦即解決問題上根本就無用任何可行又實在的方案去嘗試解決問題,林鄭不停重播人大決定不能改的前題下,學聯仔又要突破個box去同你傾,咁呢一個層面如果埋唔到deal,政府又有無其他野可以做呢?


目前黎講,林鄭的答覆係呢样又唔得果样又唔得,如果你上立法會咁講都算,但佔中已經二十幾日,你要傾就真係只係傾,學聯仔都已經讓步話廢除功能組別同叫政府交出時間表去重新做過一個有公民提名的方案,當然政府未必要take the deal,但係你交一份咩報告去做參考就想叫食幾十個催淚彈的市民番屋企,呢個嚴重低估市民智慧的目光先係最大的問題。


老實講如果林鄭行出黎傾的籌碼只係諗住用一份參考報告就會收到科,呢個一係就係代表無誠意,一係就代表班官係低能,又或者班官係以為市民係低能的,所以收唔到科係意料中事。問題係,林鄭又有無能力可以攞到籌碼去傾呢?我認為又係無的,因為佢又唔係梁振英,不能說了算就算,而中央同佢就更加隔多半重,名不正言不順,佢只係一隻棋子,根本做唔到D乜。


隊長認為,如果學譚志源講話要務實的話,或者其實第二輪的工作就直接同學聯仔以及市民去多方商討,落實一個1200人的代表係可以覆蓋更多民主成份組成的提委會,唔係一個只有建制無其他光譜的方案,如果政府能比學聯係呢一階段有實際性的參與工作的話,也許都係一個可以埋deal的事情,不過代價就係要得罪現有的1200提委同港區政恊,實際上又會有極大阻力,所以好大機會都係不停loop,然后一係就等警察血腥清場,一係就等容忍市民佔領半年一年兩年,大家鬥耐性。


而用番呢個政治形態黎講,好明顯CY政府已經無左實權,大部份野目前都係要上報中央,一國兩制係呢個時間都可以話蕩然無存。呢種氣候下,市民的反抗力亦會大增,政府想再推更多的政策只係寸步難行,特別係想係立法會再過更多的議案只會遇到無盡的阻撓。因此,如果政府想再大規模收地(如東北),或咩填海啊,改用途啊,搵地啊呢D野,都會面對社會的重重阻撓,唔好講你成唔成功攞到地,就比你去做,本來上下一心都要三幾年的野,呢家目下呢個政府想係任期前完成到一個project都應該幾難。


換句話講,一個跛腳政府,你旨意佢增加供應,可謂難過登天。而且你叫佢呢家做任何動作,如比地產商補地價農地轉住宅地,又或者出手再打樓,呢D也許係想做好事但又刺激民情的動作,相信都唔會係現任政府再敢做。寸步難行下,如果佔中又無影響太多買到樓的人的經濟的話(即受本土零售經濟的收入人仕),樓市相信繼續係一面倒咁更加上升。


一言以蔽之,政局越亂,供應越少,樓價越易升。



留言

此網誌的熱門文章

被退休的CEO

DSE題三: 專精一事還是多元人生

大圍車位的潛力