全職股神

每一年當股市稍為暢旺，不難我地成日會聽到坊間又會出現一批少年股神，又或者係討論區提出辭去工作，以全職炒股為生的目標的人。


講真，聽呢D故事背后，首先為免又有一堆鍵盤戰士出擊，我都唔排除有人真係股神，有人真係可以做到所講的野，但實際上有幾多人做到，又有幾到人輸到一褲都係呢，如果要比例黎計，我相信一定輸到HIHI的人係多數。


人生行到呢個年紀，身邊總有好多不知天高地厚的人曾經認為自已可以戰勝一切，特別係係股票市場，以為三幾十萬就可以嬴錢，又或者賺個生活費，我曾經都係其中一員。不過可惜，股市變化萬千，你一兩個月Win大錢，無問題，但一個小股災，就可以攞你狗命，呢D野我同我身邊識的人都聽過唔少故事。


所以，如果有人話比你聽可以全職炒股生活的話，我大部份時間都係得啖笑，而且你越后生我就越唔建議，始終好好地有個職場的規劃比你你唔行，但如果比你炒番兩三四年后得個桔，之后想搵番份工真係又晒時間，又要吹水呃人話你去左外國果D咪得啖笑，不過咁都好彩只係由頭黎過。之但係我聽的故事入面，亦不難聽到有人輸幾十萬要孭住條數做人，試諗下有邊份工打工會打到有negative數呢？搵食姐，咁搞就真係無謂。


而近日又更加見到有個湊仔公，呢家係大陸有數個物業，月入三萬幾，然后再加上股票期權，已經在享差唔多（半）退休生活，仲上埋電視好似生活無憂無慮咁，真係好似好正，不過細心睇呢位仁兄的經歷，我實在唔係好計到條數出黎。


http://the-sun.on.cc/cnt/finance/20130218/00434_052.html


當然，條數佢亦無完全公開，我亦無乜興趣再去dig deep on佢的background，如果我估錯講錯亦請見諒，之不過如果佢只係係銀行做左3年，靠3年的收入買到一層麗港城的話，講真就當你iBank都係講緊頭兩三年的收入，平均都係2球一年左右，三年咪六球野，減埋稅啊呢样果样，個本得果4-5球左右，都未計你食計你洗啦。如果唔係ibank做三年野有幾錢，大家都心照啦，而睇埋佢話呢家攞住30萬黎玩，唔係100-300萬，咁即係你本身都應該唔係做果三年野搵到D咩錢啦，之后無收入的話，我只可以諗你應該得番兩個收入 -- 1.物業　2.老婆。


好啦，樓的話，你買一層，之后當你一開二至三，無收入靠老婆，借亦唔借得好多，自住樓要加按又即係未供得晒應該，錢我相信有得win，如果唔係都唔會敢退休，但係你話win好多咩，我相信5球野應該差唔多，然后轉番大陸買物業月入30K，呢下我就唔係幾識計啦，始終大陸物業租金回報普遍低，而大陸息口又普遍高，當你香港做按食埋呢舊又賺多二三百萬，但點都應該仲有幾條大陸按揭係身，加埋香港自住樓的按，理論上表面月入三萬，實際還債亦唔少野。


我唔敢講我完全岩晒，但呢條數係無外力的資助下，應該雖不中亦不遠矣，咁如果係咁的話我堅唔係好明佢點解咁勇可以玩退休，因為我相信如果以隊長的投資回報都應該比佢高或者就算差唔多的情況下，我都唔夠膽講係呢一刻退休，如果做野3年又無人幫，理論上你本錢少，比你食到盡個樓市都賺唔得多的情況下，咁都可以退休的話，呢條數我絕對計唔清，除左最后一個可能性就係佢老婆收入頂住，以老婆收入養家，以租供樓，等十幾廿年時間供甩，人生就搞掂，之但係......咁係咪即係咬老軟呢？


如果真係咁有能力的話，會唔會係連老婆都唔駛做會好D呢？除非老婆又係做老師係人生興趣咁就另計，不過我相信呢個case，如果佢地四十零歲就合理，三十中可以咁，除非屋企大把，即李檡楷話比你聽佢財務自由，你都廢L事聽啦，叫佢講比你聽商業世界的成功故事好過啦。其實如果我係佢，咪做野做多幾年，當你一年搵多一百萬（因為唔知佢係咩bank la），你做三年都搵到咁多野，比你做多五年先退休仲唔識飛天咩，捱多幾年就有一個肯定唔會錯的退休生活，咁都唔制？睇黎佢真係好醒目，又或者係我計數大錯特錯。


講真，其實佢條數點計唔係我想講的重點，但反而成篇野的目的，係想講人生係后生時捱下好正常，一來為社會出一分貢獻，二來亦趁自己最捱得最有條件的時候捱係好合理，特別係響職場上，經驗同收入都係要靠時間去浸淫，你突然間無做野五至十年，人到中年先搵番份工，低人工你又唔制，高人工人地又嫌你咩都唔識，最后人生四五十歲又玩中年危機，為乜？


計錯數的人真係好易，但如果你識計的話，二十出頭捱幾層樓番黎，四十中已經收得工，差少少五十歲都叮噹叮噹可以退休，但相反呢個時候你準備享受世界的時間，先見到呢個湊仔公發現自己計錯數，入番黎你公司由頭做起，收入都可能係要用黎還番果條唔知邊年突然大插五日而輸錯方向的期權債時，你會發現原來電視同報紙的新聞特輯，到最后都只係一個沒有財商的記者碰上一個老散的故事而己。