Single Income的人生

今日係facebook轉載左巴菲特的名言，其中第一句就真係一矢中的，的確人生千萬唔好死靠一份工的single income，唔係你就真係碌７。

曾經我寫過"你條命值幾多錢" ，如果無睇過的朋友，再諗多次你自己一生人打份工可以搵幾多錢，就知我地靠一份工有幾"平"。可惜的係呢個世界的洗腦方式令好多人都認為讀大學搵好工係必然的一條路，點解可以靠打工上位令生活好過一點，成件事等同於我叫你做奴隸你仲好理所當然咁，希望做一個出色的奴隸，搞乜？

點解今日講呢件事？原因係有好幾样野又刺激到我思維。首先，一年一度的大學的"良師"program又準備開始，我今年又會再次收多幾個大學生朋友仔比我了解下。舊年的經驗話比我聽，係佢地眼中，我係無野教到佢地，亦無任何價值，所以全年都無再搵過我，哈哈，問你死未，所以我想睇下今年的新一批人又係咪咁現實之餘，我又想試下調整一下我的tone，睇下係咪應該幫佢地做一個出色的奴隸，定係帶佢地離開奴隸的思維。

另一邊廂，今日我亦見到有人同我講佢要展開財務自由的道路，不過佢的內容全部都係以炒股為主。一同佢傾完，我就覺得好古怪，因為其實財務自由的定義並非你用炒炒炒的型式然后賺一舊大錢就叫財務自由，因為炒賣的回報唔係一個可以預期的現金流，因此，財務自由的定義我必須再帶出：

被動收入　>= 經常性開支　= 財務自由。

所以如果你係炒炒賣賣的話，果個現金流理論上係未必可以predict，所以好難講話你大唔大得過你每個月的經常性開支，當然你話你炒一野賺左一億，夠你未來50年的經常性開支，咁我吹你唔L漲，但係以我地呢D柒下柒下只係識買樓收租的人，我只係識用租金收入計數，所以或許是同路人，不過我清晰的感到大家的分別。

但點都好，但最大穫的係，今日又傾開另一個人，仲係以一個single income的模式去操作。不過其實又唔係話勁大穫，因為其實single income的人周圍可見，旺角一車撞埋去可能有90%的人都係咁生活／生存緊。可惜的係或許我地傾談間對呢一位K先生係有點期望，但可識係佢的人生睇起上黎卻沒有計劃過，哪怕佢有一份好的工作，但換黎的卻只係如要請工人，養小孩的家庭開支。不過，醒目的佢有屋企比樓佢住，可叫做減輕左負擔，但係呢個天生的優勢反而造就佢唔駛買樓，亦唔會諗投資及財務自由，所以有時屋企的條件同教育，真係會影響人一世。

可能你會話有無咁嚴重啊？其實係有的，因為你諗下如果你自己係財商＝零的時候，你覺得自己好偉大地窮一生的精力去養家活兒，自己捱生捱死都要比最好的野比老婆同仔女，亦期望D仔女透過唔同的補習班興趣班同旅行，將來得到更好的成就，而自己就委屈D，食少D，辛苦D，感覺好值得的話，簡單黎講我送個ON99比你。唔係話以上的野唔值，老實講我有仔女時一样會比最好的野佢地，但分別的係你以single income去埋單，我就由租客幫我埋單，句號。

不過唔知係咪有Ｄ人好中意果種偉大的父愛母愛，認為自己眠干淚濕咁自己委屈D比子女最好的，會有一種滿足感。但相反，你又會唔會fast forward 30年，諗下你退休時得番份MPF的時候又會點？做你個仔，你供左我幾十年，都係時候要報親恩，所以那怕佢只係搵果萬零兩萬蚊，都叫做會比番三幾千你做家用，始終父母都叫有份MPF。好了，到個仔十年八年后工作好了，人工加了，但你倆老的MPF又差唔多洗得七七八八，局住加個份人工又要加料比你。

到自己搵到愛人，十年的積蓄又要攞黎擺酒，一次過清袋仲可能要負債，到時樓又買唔到，但屋企人每月的家用就仲係唔少得，之后唔知好定唔好又有小朋友，岩岩回到氣又話要開始養仔養女，一個人養三代，真係吃力到唔識講野。當然，每個家庭都有唔同的狀態，不過如果準備又或將來要做人阿爸阿媽的你，唔識得點样用passive income去令自己財務自由，受害的唔一定係你一個，而且仲會制造隔代的財政壓力。

所以，財務自由係我地呢個新世代好重要，你識行的，你的下一代都會輕鬆Ｄ，如果唔係讀幾多書都無Ｌ用，因為你只會變成下一個世代的高等教育奴隸。