豪豬族

昨天同一個90后的朋友傾計，了解到佢的財政狀況，令我感慨而家有好一部份的90后比父母溺愛到一個地步，對錢對呢個世界的一切已經無左概念，豪豬族亦因此產生。 所謂豪豬，係由豪同豬所組成。故名思意，豪係指佢地洗錢好揮霍，總之乜都豪洗豪食，但型就型在佢地大部份都覺得已經係好慳，如佢地食一歺飯人頭300蚊都係一件好慳的事（我認為唔係貴，但都唔算係慳），因此佢地唔覺得自己豪，認為一切都係理所當然，或者只可以話係基本的生活。 而豬的定義，亦有兩個解釋，一就係佢地像豬一样係由父母所供養，現時係無任何的生產能力，將來有無就另計。而另一個解釋，就係佢地像豬仔一样比人愛到好似傻下傻下，唔太了解世界的一切，主要的生活就係食，玩同訓，或許佢地將來可能係有好勁的未來，但現在仲係像豬仔一样生活緊。 而我所識的豪豬，係一個係外國讀書的妹妹，家境也許就係我地所講的中產吧，生活唔成問題。而每月的洗費，只係咭數屋企都幫佢清晒，每個月大約都會洗10000元咭，+可能有3000-5000的現金支出，即係每個月都要洗15000元。講到呢度，相信有唔少讀者都可能話，嘩，Hi，我一個月都係搵15-20K，但一個未做過野的小豪豬就可以洗15K，豪不手軟，但呢個正正就係豪豬族的人生。 我同豪豬仔講，雖然有點老土，但真係叫你去搵15K睇下你會點，佢好快咁回應我話其實佢都知，佢都明白，不過佢話唔知點解洗下洗下就會洗左咁多，諗番都唔知洗左去邊！然后我建議佢話，不如試下記低你一個月的洗費，之后諗下邊D野係必須的，然后再控制下。佢的答案，對於我的建議，佢話而家所有野都係"必須"的，佢話而家讀書番黎，同D同學social下，食下野，去下LKF clubbing，咁就差唔多，唔通唔同人social咩？ 佢再指出，而家LKF係一個好貴的地方，入場費+飲酒下下都千千聲ga la，cheap仔的我話好多我地D cheap精都係係7-11飲到咁上下先入場，慳好多ga ma，咁佢就話入到clubbing都要比min charge，總之d錢就走唔甩要洗ga la。 其實講到呢度，都無咩好再講落去，因為每個人的價值觀唔同，年輕人中意去玩係正常不過的，但只係係未有搵錢能力時，卻過著豪著般的生活，那怕到將來有自己搵錢的能力時，我相信頭三五年都只係一個月光族，甚至可能越洗越勁，到時一身咭數，唔好講向上流，就算要頂住唔向下流都可能因為豪豬的習慣而暫唔住腳。 回想我那時係美國讀書，唔好話自己part time做野呢D我少爺仔都唔中意，但係我洗每一蚊都會深思熟慮。當然我那時的網遊生意做得好好，令我可以靠自己生活到兩年，之但係呢兩年的生活一定同豪字無乜關係。基本的消費係必須的，同同學食飯打保零篤波我一样全部有，但問題係同一的洗費我地係可以去D平歺廳，平時段以慳番個成本，因為我地背后都明白屋企供養的壓力，奈何今日的豪豬族好像連呢一點都忘記。 所以，呢個由怪獸家長世代所形成的豪豬族，從家裡慢慢步入社會，好多價值觀已經慢慢改變，好多事物都變成理所當然，而一旦福利未能滿足佢地的時候，就會好似係屋企咁，喊下嗲下叫下呻下就有機會得到佢地想要的野，情形就像今日好多人話上唔到車買唔到樓咁，錯係在於樓價高炒家肥政府西，但自己的豪豬洗費月月清卻係理所當然，豪豬族的也許會將香港帶向一個日落的地步。