[BK018] 樓市拉鋸戰

由上次發文開始，又過左兩三星期，股市樓市都非常波動，一來無諗過係貿易戰停火後馬上黎一單加拿大捉華為公主事件，而中國又捉番幾個加拿大人做人質，係呢個國際環境氛圍下，美股就即時急速調整，港股其實都相對幾硬，美股跌500的日子都好幾個，但港股都係25500-26500徘徊，叫做無話比美國拉下之前的24800左右的底位。


樓市係咁的情況下，其實理應好差。之前屯門個超級納米盤銷情之差雖然可見係十年難得一遇的差，平心而論如果市況真係會唔小心一Q清，但可惜生不逢時。二手樓方面，隨住居屋抽籤完結，其實都有好多成交回流，成交量的確上升，但係亦不得不承認力度上升不足，但減價盤似係遇著回流的購買力對上而有回暖的成交，呢個係一個好事，但係要破頂重拾升軌，可能係咁样的市況下都要多點時間等突破點先得。


本來的一個突破點就係加息，聯儲局昨日加息0.25厘，本來侵侵同市場人仕都勁啡聯儲話股市跌到咁唔應該加，不過獨立自主的聯儲局仲要全部贊成加息，美股又一似跣低，本來呢個壞消息理應都係要繼續挫下樓市，不過今日匯豐中銀同渣打都講明維持P不變，即係話香港資金仍然充裕，而且實際上美國加香港又再一次唔加，都算係壞消息中的好消息，至少無進一步再挫一挫香港樓市。而且，根據利率期貨，市場亦仍為出年聯儲局會減慢加息步伐甚至唔加，都係一個少令樓市多一重忍憂的預期。


而另一個突破點就可以參考凱匯，夾起動九龍東，地鉄上蓋同新CBD的prime location概念下，信置以先低後高的唧牙膏式開賣，隨即收幾千票沽清首批樓花，然後第二張價單稍稍賣貴D都一样照清，隨後的價單其實都再貴左，就目前而言應該銷情都係好正面，呢個盤係新盤市場下一枝獨秀，食盡一二手的購買力，其實都可以睇到係18000蚊一呎的水平下港樓係絕對有支持，呢個盤咁賣法雖然唔能夠帶起全港樓市，但為香港樓做探熱針把把脈都睇到香港樓市係有動力有心跳，只係目前唔爆發出黎住。


雖然隊長預期新年前後有小陽春，但以目前的情況睇黎，小陽春應該好難係年前出現，始終政治野呢家遇著中美兩國成日磨拳擦掌，就當無乜實際打擊，但日日一報有乜新動態個股市就痾拔甩，的確要更多時間睇到有實際進展先可能會有突破。不過，大家睇到一样野就係呢家中國有錢佬同官應該都唔敢再積極投資美國加拿大等地，好話唔好聽一間錢去左但人去唔到，除時變失匙夾萬。就呢個情況下，香港仍然係有吸引大陸資金的好地方。


所以係中長線其實相信唔會太差下，隊長係呢個時候都有積極開始搵盤。但尤如隊長之前講過，亦唔知會唔會林鄭都唔小心睇過下隊長上篇文，其實而家話樓市下跌，都未跌低過舊年年底今年年初的價錢，所以以隊長呢家的心態係真係有人等錢洗先會出手，其實最近乜都睇緊，工廈／住宅／車位，全部都有留意，但講真調整的幅度都仍然唔吸引，至少對比起股市的跌幅，呢家可能都係買股有著數，不過你永遠唔知幾時有邊個肯跌舊貨出黎比你執，所以呢跌時間真係要努力同D代理打下牙較搞好關係。


樓市拉鋸下，隊長認為都係繼續持盈保泰為主，太高槓桿的就努力減債，自住樓就唔好賣，未上車或太多錢的，反而就係一個試執荀野的好時間，的的確確，呢家你攞住張票，大把人會陪你搵盤。