我很「大洗」啊, 點算?


網上有一篇類似的作品,我諗諗下倒不如我又寫番篇狗UP的文,反正已經係無質素的文章下,最多都係鬥垃圾,要比人小咪兩份一齊小囉。


說回大洗呢件事,首先隊長都要利申係一個大洗之人,有時大到我自己都驚驚地。但從有車無樓嫁唔過一文當中,其實多多少少本身隊長都帶出過一個信息,就係大洗本身背后係邊個埋單,先係關鍵。


當然如果你伯爺家山有福,有幾百億未開頭,你人生最困擾的就係點样有效地大洗晒D錢,呢篇文你可以唔洗睇。但如果你係一個打工仔,搵幾多洗幾多,隨時仲每月洗突的,咁你就要好應該諗下點样搞一搞你的財務狀態。


其實先從一個簡單的數學題黎睇,你的收入如果定左係一個數,你能控制的就只有支出。所以從大洗的角度黎睇,我第一個答案就係叫你洗少D,再簡單不過。坊間有好多乜春理財達人,點样教你慳錢,點样記低D錢洗左去邊,點样食麥當勞最抵,點样坐車由一個地方去另一個地方最慳錢咁,呢D野隊長幫你唔到,因為思維上本身都唔係向呢一方面發展的人,主因又係一個簡單的道理,就係你慳極都係最多得你份人工,叻極都係咁多,有乜咁威?


所以,如果你又忍唔住大洗的話,從思維上去番條數學的公式,支出唔肯減但又要有番錢剩,唯一的可能就係增加你的收入。你有呢個思維就開始可以幫到你的人生,因為只有不停增加收入,先會滿足到你的大洗慾望。當然,你如果無睇開我個Blog的話,可能對財務自由又係一個好陌生的詞語,因此你第一下諗到的就係可能我份工搵黎搵去都係雞碎咁多,老闆又賤加人工每年加我一百幾十,做多份part time一來我又唔係讀書叻,二來我又想多D時間享受下人生,簡單D黎講最好就係個天跌錢落我戶口比我洗就fit了,有無咁的方法呢?


方法就唔係話無,之不過就睇你有無正確的思維。當然一個偏門的方法就係呃老綜,不過如果我寫咁長的野叫你去呃錢,你唔小我,我都睇唔起自己。而正確的思維係,點样令到自己坐係度都有收入,而只要你諗得到呢條橋,將來個世界就係你的了,到時你想洗幾多咪幾多囉。


當然,作為一個香港人,最直接的諗法就係買樓收租。如果係呢一刻,見到"買樓收租"呢四個字的感覺係離我很遠,而馬上準備按Ctrl + W熄左個browser的話,我可以話比你聽你又離開真正的財務自由又遠一步。有時有D野,只係你學同唔學,諗同唔諗,以及做同唔做的分別,學愛因爛坦的名句,痴線的人係不停左同一样野,但每次都希望有唔同的結果,而你就不停番工不停洗錢,希望有一日你可以解決到洗錢呢件事,只會證明你自己係痴線。


其實買樓收租並非一件什麼難事,大有大買細有細買,有時又同買股票一样,你唔係自住,等同於你買股票唔一定係果間公司做,根本入面點運作你無需理會,正如買細樓一样,點細點遠無乜所謂,最緊要就係有錢賺。買樓本身可以賺樓價,亦可以以時間賺租金,拉長十年廿年黎計,你收下收下租慢慢就會供完層樓,也許你話十年廿年好似好耐,但係耐都叫做有個方法,好過你十年廿年都仲係浮浮沉沉。


不過講就易,第一個問題你肯定係話無首期,或者唔夠。當然,呢個就係一個取捨的問題。你可以選擇呢幾年洗少D,然后儲舊首期出黎,之后十年八載后你的人生可以勁豪洗。又或者,你可以勁豪洗,到你四五六十歲先黎驚自己無個錢,人生總係先甜后苦同先苦后甜,睇你自己點揀。


但到最后一個最苯的儲首期方法,我認為係你可以走去買份乜春保險基金,每月月頭先攞你一萬幾千夾走左,等你戶口少D錢,自自然然個人就會慳D洗,總好過你每月洗完睇下有幾錢剩先儲起,甚至連儲起果份都洗埋洗突,雖然我唔係咁鼓勵買保險基金,但對於一個無紀律的人,借助外力去儲錢也許係一個比較苯但又實在的方法。不過點都講一講,唔好買咁長時間,買5-8年最長好鳥。


最後,大洗其實都係一件促進社會經濟的事,問題記住係點解有D人大洗得黎不停仲有,但有D人洗完月尾就唔見人,關鍵就係邊個埋張單。而隊長成個思維的精神,就係搵人幫你去埋你張單,你洗人地的錢,一定爽過洗自己的錢,明無?



留言

  1. 回覆
    1. 美國個班賊頭就係不斷鼓勵啲人借錢消費,不斷借信用卡,叫人唔好草錢,叫個班土豪買佢個國債,然後冇錢還賴帳,然後話我唔係冇錢還,只不過慢慢還,拉長時間嚟還,講打你又唔夠我打(指軍事),我洗錢你幫我埋單,爽過陳爽。

      刪除
    2. 唔係擦鞋,這篇是一篇好文, 有見地。

      刪除
  2. 所有問題回到經濟學層面,香港房屋量及公屋數目不停增加,供過於求的情況下,有可能影響租金收入。美國加息又有影響,經濟情況影響個人收入,所有事情到有風險。

    回覆刪除
  3. 很好的概念,不應該限制自己的大洗欲望,當然也不是什麼也不做,而是想辦法利用這個欲望去幫自己逹到財務自由,支持!

    回覆刪除
  4. 非常好的文章。 坊間只教人點慳點慳, 就當可以慳到丁點, 也只是有限數。 只有"錢係賺返嚟, 唔係慳返嚟"嘅思維, 才能通往財務自由, 可惜身邊認同嘅人唔多。 支持隊長繼續好文章

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力