一年半計劃


呢個計劃只係for我自己用,因為每個人的portfolio唔同,彈性唔同,所以做唔做,同做唔做到,都唔一样。


其實呢段時間,隊長我又開始review一下自己的財政狀況,據我年初時講過我今年的計劃后,我諗左一輪發現其實都要改變策略,先有機會達成CY講的住大D的諗法,故此,我需要一個進可攻退可守的計劃先有機會再上一層樓。


主要的原因,係隊長都開始諗緊人生的下一步部署,始終香港黎講住600零呎樓都會有一日唔夠住,不過行出街你想搵成千呎的樓,又堅係下下都過千萬以上,加上而家的按揭要求咁苛刻,你要我買一層過千的,可能要放棄三四層手頭上的樓,之后仲要供到爬街,相對我而家拥有的,好似唔係好對稱,故此又係時候動動腦筋。


係目前的情況下,我節錄左幾個自己的睇法:


1. 2016-2017年樓市開始會動盪,但隊長唔係聖人,我都會有錯。
2. 目前隊長的自住樓係半新樓,相對較貴,同價的二手樓可以住大點。
3. 有大部份的小型屋苑的細單位跑win大單位,即你如果買果D屋苑的大單位,可平價自住。
4. 尚差20%左右,我就可以完全靠收租 > 供樓。
5. 元朗樓租務回報太低。


故此,隊長目前的諗法,就係要賣自住樓,然后稍微向下遊,買番間小型屋苑的大單位,一方面可以套番現金出黎坐住,另邊廂再賣埋元朗樓,然后再加入secret project,到時我計算過,以目前水平,我仲可以手楂一套幾可觀的現金,然后仲坐住數層樓之餘,自住果層又唔係差太遠得黎,租金仲可以完全頂晒供樓。


呢個境界,可謂進可攻,退可守,因為樓價上升,隊長的手頭物業都會受惠。而如果樓價下行,到時所有手頭上的樓已經係按揭低於50%,甚至40%,無咩好驚。但手頭上的資金亦可以令我突然一下買個過千呎大單位,免卻再將槓桿放大的風險。而如果樓市係牛皮的話,租金平衡供款的兩三年,將可令隊長休養生息,一方面減債,一方面人工再可以儲多一舊出黎,到三兩年后連同手頭上的資金再作打算,呢個都算係一個不敗之地的諗法。


行呢一步,亦其實想体現一個我的思想哲學,就係無錢的話就要能屈能伸。當然,隊長話比你聽無錢你亦會話我搞爛gag,但實情係我又唔覺得自己算係有錢,因為像我之前講過,我手頭最痴線果時可以戶口得番93.5,而呢一刻亦只係去番5位數字,所以以現金流黎講,你我都可能係差唔多,我亦感受唔到咩有錢的感覺。


相反,我成日覺得賣自住數等跌係好硬膠,之不過賣自住大樓,換自住細樓,卻係一個財技的演繹。不過呢個多多少少要考D眼光,我亦係一個散戶想去挑一挑呢個機會,之但係同一般人唔一样的係,我點都會有貨係手去等跌,咁样先唔會比個樓市的快車去拋甩,相對比如果你係得一層自住樓去nake short個市,我相信我個portfolio會係合再好多,再者我等跌時層細樓都係買的,簡單D黎講只係de-leverage個portfolio again。


所以未來一年半,我會出貨3件,諗住買入2件,但大家唔好誤會我睇淡,我仲有好多樓係手,呢個只係一個re-balancing的動作,做完個portfolio就會更靚更不敗而己。



留言

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力